aao puraani yaad ke shoalon mein taap lein — Yusuf Taqi

be-sadaa kyuun guzarte ho aavaaz do
ab bhi kuchh log andar makaanon mein hain

ai paDosi tu bataa ham ko to kuchh hosh nahin
thaa hamaaraa bhi koi ghar tire ghar se pahle

dekhaa to zindagi mein bahut kaamyaab the
sochaa to jiit aai nazar maat ki tarah

shab palang par haanpte saae rahe
khvaab darvaaze khaDaa taktaa rahaa

khaansti maddham si ik aavaaz jab se kho gai
ghairiyat ki bu se mahkaa mujh ko apnaa ghar milaa

mere khvaabon ke jharokon ko sajaate rahiye
na sahi vasl magar yaad to aate rahiye

tumhaari yaad kaa chehra hamaare dard kaa rang
nikhar gae hain sabhi ashk-baar hone se

zamaana guzraa havaa phir se yaad aane lagaa
na jaane kaun mujhe khvaab phir dikhaane lagaa

tarkash-o-daam ki haajat hi nahin hai tum ko
tum ho sayyaad to khud said hai fitraak-ba-kaf

subh ki chaae se phir aaiin yaad
tere pahlu mein chaae ki shaamein

raat bechain si sardi mein ThiThurti hai bahut
din bhi har roz sulagtaa hai tiri yaadon se