DhunD rahaa hai dariyaa kis ko — Aslam Rashid

kuchh sazaa aur baDh gai is par
zakhm khaae to muskuraae kyon

mujh se baahar nikal rahe the sab
main bhi hairaan saa nikal aayaa

din din bhar aaina dekhaa jaataa hai
tab jaa kar do chaar ishaare bante hain

aap kaa to shauq hai jalte gharon ko dekhnaa
aap aankhein nam kareinge aap rahne dijiye

qabr par phuul rakhne aayaa thaa
phir yahin ghar banaa liyaa main ne

hansi un ke labon tak aa gai hai
mukammal ho gayaa ronaa hamaaraa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

pahaaD jaisi azmaton kaa daakhila thaa shahr mein
ki log aagahi kaa ishtihaar le ke chal diye

tum us ke paas ho jis ko tumhaari chaah na thi
kahaan pe pyaas thi dariyaa kahaan banaayaa gayaa

samundar ho to us mein Duub jaanaa bhi ravaa hai
magar dariyaaon ko to paar karnaa chaahiye thaa

tiri yaadon ke sahraa mein sanam kyaa kyaa nahin hotaa
jahaan ho tishnagi kaa gham vahaan dariyaa nahin hotaa

bahaknaa meri fitrat mein nahin par
sambhalne mein pareshaani bahut hai