rahtaa huun main jitnaa saath sab ke — Zahoor Chohan

aakhiri baar mulaaqaat to kar li hai magar
silsila apni mohabbat kaa kahaan aakhiri hai

main apne aap mein taqsim hone lagtaa huun
use kaho ki mire saamne na aayaa kare

kabhi kabhi to miraa ghar bhi mujh se puchhtaa hai
ki is jahaan mein koi teraa ghar bhi hai ki nahin

inhi jhuke hue peDon se guftugu hai miri
janaab mere buzurgon se guftugu hai miri

zindagi kitne saliqe se guzaaraa hai tujhe
muskuraate bhi rahe zakhm bhi khaate rahe ham

puuri ho jaati agar koi kahaani hoti
ye mohabbat hai miyaan is mein kasak rahti hai

zaraa der baiThe the tanhaai mein
tiri yaad aankhein dukhaane lagi

so jaati hai basti to makaan pichhli gali mein
tanhaa khaDaa rahtaa hai makinon se nikal kar

bajaa ki raunaq-e-mahfil abhi uruuj pe hai
main kyaa karun miri khalvat bulaa rahi hai mujhe

kuchh is liye bhi akelaa saa ho gayaa huun 'nadim'
sabhi ko dost banaayaa hai dushmani nahin ki

mohabbat ne akelaa kar diyaa hai
main apni zaat mein ik qaafila thaa

main 'shaad' tanhaa ik taraf duniyaa ki duniyaa ik taraf
saaraa samundar ik taraf aansu kaa qatra ik taraf