zaraa der baiThe the tanhaai mein — Adil Mansuri

vo kaun thaa jo din ke ujaale mein kho gayaa
ye chaand kis ko DhunDne niklaa hai shaam se

dariyaa ke kinaare pe miri laash paDi thi
aur paani ki tah mein vo mujhe DhunD rahaa thaa

kab tak paDe rahoge havaaon ke haath mein
kab tak chalegaa khokhle shabdon kaa kaarobaar

soe to dil mein ek jahaan jaagne lagaa
jaage to apni aankh mein jaale the khvaab ke

bismil ke taDapne ki adaaon mein nasha thaa
main haath mein talvaar liye jhuum rahaa thaa

kis tarah jamaa kijiye ab apne aap ko
kaaghaz bikhar rahe hain puraani kitaab ke

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

dar kunj-e-sadaa-band kaa kholeinge kisi roz
ham log jo khaamosh hain boleinge kisi roz

ghamon par muskuraa lete hain lekin muskuraa kar ham
khud apni hi nazar mein chor se maalum hote hain

dauDti haanpti aai thi udaasi mujh tak
mere siine se lagi aur zaraa sustaai