ham jo pahunche to rahguzar hi na thi — Zehra Nigaah

dekho vo bhi hain jo sab kah sakte the
dekho un ke munh par taale ab bhi hain

uTho ki jashn-e-khizaan ham manaaein ji bhar ke
bahaar aae gulistaan mein kab khudaa jaane

jo dil ne kahi lab pe kahaan aai hai dekho
ab mahfil yaaraan mein bhi tanhaai hai dekho

kahaan ke ishq-o-mohabbat kidhar ke hijr o visaal
abhi to log taraste hain zindagi ke liye

divaanon ko ab vusat-e-sahraa nahin darkaar
vahshat ke liye saaya-e-divaar bahut hai

dekhte dekhte ik ghar ke rahne vaale
apne apne khaanon mein baT jaate hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

tujh se milne kaa raasta bas ek
aur bichhaDne ke raaste hain bahut

tanhaai ki ye kaun si manzil hai rafiqo
taa-hadd-e-nazar ek bayaabaan saa kyuun hai