zindagi se milaa nahin kuchh bhi — Zubair Ahmad Saani

is vaaste muhaal hai ham donon mein nibaah
tu khud-numaa hai main bhi riyaa ke khilaaf huun

aaiye shauq se bhaunchaal bapaa kar diije
bazm-e-dil aap ki khaatir hi sajaa rakkhi hai

mauzu'-e-guftugu to hai jinsi jamaaliyaat
aur markaz-e-khayaal tumhaaraa hi jism hai

chashm-poshi karein mukhlis hain vafaa mein vo agar
kyon mire achchhe-bure par vo nazar rakhte hain

tiri maa'sum nigaahon ke taqaddus ke tufail
'ishq tahzib se aaraasta ho jaataa hai

roz miltaa hai bulandi kaa nayaa ziina mujhe
roz taklif kai logon ko ho jaati hai

kam-umri mein sunet hain
mar jaate hain achchhe log

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

vo ek pal ki rifaaqat bhi kyaa rifaaqat thi
jo de gai hai mujhe umar bhar ki tanhaai

jaan bhi saath chhoD deti hai
ye sabaq zindagi se miltaa hai

zindagi kitni masarrat se guzarti yaa rab
aish ki tarah agar gham bhi gavaaraa hotaa