kyon tasavvur men ji raha huun main
jab haqiqat men mar hi jaana hai

Divyansh Rawat

Thiik aa.i tan pe apne qaba-e-barahnagi
baani libas chhoTe hue ya baDe hue

Haidar Ali Aatish

apne hain sab paraya koi nahin
par mire dukh men aaya koi nahin

Divyansh Rawat

zara parda haTa do samne se bijliyan chamken
mira dil jalva-gah-e-tur ban jaa.e to achchha ho

Ali Zaheer Rizvi Lakhnavi

us ke munh pe mukar gaya tha dil
aaj had se guzar gaya tha dil

Divyansh Rawat

kucha-e-yar men ho raushni apne dam ki
ka.aba o dair karen gabr o musalman abad

Haidar Ali Aatish

bastiyan hi bastiyan hain gumbad-e-aflak men
saikDon farsang majnun se bayaban rah gaya

Haidar Ali Aatish

karta hai kya ye mohtasib-e-sang-dil ghazab
shishon ke saath dil na kahin chuur chuur hon

Haidar Ali Aatish

bahr-e-hasti sa koi dariya-e-be-payan nahin
asman-e-nil-gun sa sabza-e-sahil kahan

Haidar Ali Aatish

chhuT-puTa vaqt hai bahta hua dariya Thahra
sub.h se shaam hui dil na hamara Thahra

Haidar Ali Aatish

tamam paikar-e-badsurti hai mard ki zaat
mujhe yaqin hai khuda mard ho nahin sakta

Farhat Ehsas

puuri tarah se ab ke tayyar ho ke nikle
ham charagar se milne bimar ho ke nikle

Farhat Ehsas

hatheli se ThanDa dhuan uTh raha hai
yahi khvab har martaba dekhti huun

Fariha Naqvi

nakhuda hai maut jo dam hai so hai bad-e-murad
azm hai kashti-e-tan ko bahr-e-hasti yaar ka

Haidar Ali Aatish

khana-e-zanjir se misl-e-sada Darta huun ab
yaad aata hai kaf-e-pa men khaTakna khaar ka

Haidar Ali Aatish

sa.i-e-la-hasil mudava-e-mariz-e-ishq hai
thamna mumkin nahin girti hui divar ka

Haidar Ali Aatish

suni na ek bhi zalim ne aarzu dil ki
ye kis ke samne ham arz-e-hal kar baiThe

Hairat Allahabadi

maut se pahle jahan men chand sanson ka azaab
zindagi jo qarz tera tha ada kar aa.e hain

Haider Qureshi

khamosh zindagi jo basar kar rahe hain ham
gahre samundaron men safar kar rahe hain ham

Rais Amrohvi

ham bhi tire beTe hain zara dekh hamen bhi
ai khak-e-vatan tujh se shikayat nahin karte

Khursheed Akbar