دلوں میں دشمنوں کے اس طرح ڈر بول اٹھتے ہیں گواہی کو چھپاتے ہیں تو منظر بول اٹھتے ہیں مری سچائی میری بے گناہی سب پہ ظاہر ہے کہ اب جنگل کنویں صحرا سمندر بول اٹھتے ہیں وہ پتھر دل سہی لیکن ہمارا بھی یہ دعویٰ ہے ہمارے لب جنہیں چھو لیں وہ پتھر بول اٹھتے ہیں بدل جاتے ہیں اک لمحے میں ہی تاریخ کے دھارے کبھی جو موج میں آ کر قلندر بول اٹھتے ہیں یہ کیا جادو ہے وہ جب بھی مرے ملنے کو آتا ہے خوشی سے گھر کے سب دیوار اور در بول اٹھتے ہیں زبان حق کسی کے جبر سے بھی رک نہیں سکتی کہ نیزے کی انی پر بھی ٹنگے سر بول اٹھتے ہیں لبوں کی قید سے کیا فرق آیا دل کی باتوں میں کہ سارے لفظ آنکھوں سے ابھر کر بول اٹھتے ہیں عجب اہل ستم اہل وفا میں ٹھن گئی حیدرؔ ستم کرتے ہیں وہ اور یہ مکرر بول اٹھتے ہیں

غزل · Ghazal

fasl-e-gham ki jab nau-khezi ho jaati hai

فصل غم کی جب نوخیزی ہو جاتی ہے درد کی موجوں میں بھی تیزی ہو جاتی ہے پانی میں بھی چاند ستارے اگ آتے ہیں آنکھ سے دل تک وہ زرخیزی ہو جاتی ہے اندر کے جنگل سے آ جاتی ہیں یادیں اور فضا میں صندل بیزی ہو جاتی ہے خوشیاں غم میں بالکل گھل مل سی جاتی ہیں اور نشاط میں غم انگیزی ہو جاتی ہے شیریں سے لہجے میں بھر جاتی ہے تلخی حیلہ جوئی جب پرویزی ہو جاتی ہے بے حد پاور جس کو بھی مل جائے اس کی طرز یزیدی یا چنگیزی ہو جاتی ہے غزلوں میں ویسے تو سچ کہتا ہوں لیکن کچھ نہ کچھ تو رنگ آمیزی ہو جاتی ہے حسن تمہارا تو ہے سچ اور خیر سراپا ہم سے ہی بس شر انگیزی ہو جاتی ہے ظاہر کا پردہ ہٹنے والی منزل پر سالک سے بھی بد پرہیزی ہو جاتی ہے رومیؔ کو حیدرؔ جب بھی پڑھنے لگتا ہوں باطن کی دنیا تبریزی ہو جاتی ہے

غزل · Ghazal

'ajib karb-o-balaa ki hai raat aankhon mein

عجیب کرب و بلا کی ہے رات آنکھوں میں سسکتی پیاس لبوں پر فرات آنکھوں میں تمہیں تو گردش دوراں نے روند ڈالا ہے رہی نہ کوئی بھی پہلی سی بات آنکھوں میں قطار وار ستاروں کی جگمگاہٹ سے سجا کے لائے ہیں غم کی برات آنکھوں میں پھر اس کو دامن دل میں کہاں کہاں رکھیں سمیٹ سکتے ہیں جو کائنات آنکھوں میں بکھر گئے ہیں ملن کے تمام دن حیدرؔ ٹھہر گئی ہے جدائی کی رات آنکھوں میں

غزل · Ghazal

tumhaare ishq mein kis kis tarah kharaab hue

تمہارے عشق میں کس کس طرح خراب ہوئے رہا نہ عالم ہجراں نہ وصل یاب ہوئے بس اتنی بات تھی دو دن کبھی نہ مل پائیں کہیں پہ تپتے ہوئے تھل کہیں چناب ہوئے عجب سزا ہے کہ میرے دعاؤں والے حروف نہ مسترد ہوئے اب تک نہ مستجاب ہوئے ذہانتیں تھیں تری یا اناڑی پن اپنا سوال وصل سے پہلے ہی لا جواب ہوئے حقیقت اتنی ہے اس کے مرے تعلق کی کسی کے دکھ تھے مرے نام انتساب ہوئے جسے سمجھتے تھے صحرا وہ اک سمندر تھا کھلا وہ شخص تو ہم کیسے آب آب ہوئے نہ آیا ڈھنگ ہمیں کوئی عشق کا حیدرؔ نہ دل کے زخموں کے ہم سے کبھی حساب ہوئے

غزل · Ghazal

ik khvaab ki jo aankh bhigone ke liye hai

اک خواب کہ جو آنکھ بھگونے کے لیے ہے اک یاد کہ سینے میں چبھونے کے لیے ہے اک زخم کہ سب زخم بھلا ڈالے ہیں جس نے اک غم کہ جو تا عمر بھلانے کے لیے ہے اک روح کہ سونا ہے مگر میل بھری بھی اک آگ اسی میل کو دھونے کے لیے ہے آنکھوں میں ابھی دھول سی لمحوں کی جمی ہے دل میں کوئی سیلاب سا رونے کے لیے ہے دل کو تو بہت پہلے سے دھڑکا سا لگا تھا پانا ترا شاید تجھے کھونے کے لیے ہے کشتی کا یہ ہچکولا یہ ملاح کا چکر کشتی کو نہیں مجھ کو ڈبونے کے لیے ہے تقدیر سے لڑ سکتا ہے کوئی کہاں حیدرؔ وہ حادثہ ہونا ہے جو ہونے کے لیے ہے

غزل · Ghazal

vasl ki shab thi aur ujaale kar rakkhe the

وصل کی شب تھی اور اجالے کر رکھے تھے جسم و جاں سب اس کے حوالے کر رکھے تھے جیسے یہ پہلا اور آخری میل ہوا ہو حال تو دونوں نے بے حالے کر رکھے تھے کھوج رہے تھے روح کو جسموں کے رستے سے طور طریقے پاگلوں والے کر رکھے تھے ہم سے نادانوں نے عشق کی برکت ہی سے کیسے کیسے کام نرالے کر رکھے تھے وہ بھی تھا کچھ ہلکے ہلکے سے میک اپ میں بال اپنے ہم نے بھی کالے کر رکھے تھے اپنے آپ ہی آیا تھا پھر مرہم بن کر جس نے ہمارے دل میں چھالے کر رکھے تھے حیدرؔ اپنی تاثیریں لے آئے آخر ہجر میں ہم نے جتنے نالے کر رکھے تھے

See all 16 Ghazals →

Similar Poets