Intezaar Shayari Collection

bhaage the ham bahut so usi ki sazaa hai ye
ho kar asiir daabte hain raahzan ke paanv

maanaa ki teri diid ke qaabil nahin huun main
tu meraa shauq dekh miraa intizaar dekh

raushni ab raah se bhaTkaa bhi deti hai miyaan
us ki aankhon ki chamak ne mujh ko be-ghar kar diyaa

in aablon se paanv ke ghabraa gayaa thaa main
ji khush huaa hai raah ko pur-khaar dekh kar

dil mein aa raah-e-chashm-e-hairaan siin
khul rahe hain miri palak ke paaT

vaamaandgaan-e-raah to manzil pe jaa paDe
ab tu bhi ai 'nazir' yahaan se qadam taraash

baDe baDe gham khaDe hue the rasta roke raahon mein
chhoTi chhoTi khushiyon se hi ham ne dil ko shaad kiyaa

umr bhar dekhaa kiye marne ki raah
mar gae par dekhiye dikhlaaein kyaa

phunkaa hai kis ne gosh-e-mohabbat mein ai khudaa
afsun-e-intizaar tamannaa kahein jise

hazrat-e-naaseh gar aavein diida o dil farsh-e-raah
koi mujh ko ye to samjhaa do ki samjhaaeinge kyaa

na jaane kis liye ummid-vaar baiThaa huun
ik aisi raah pe jo teri rahguzar bhi nahin

tum jaano tum ko ghair se jo rasm-o-raah ho
mujh ko bhi puchhte raho to kyaa gunaah ho

yaqin chaand pe suraj mein e'tibaar bhi rakh
magar nigaah mein thoDaa saa intizaar bhi rakh

kaun taaqon pe rahaa kaun sar-e-raahguzar
shahr ke saare charaaghon ko havaa jaanti hai

kabhi ai haqiqat-e-muntazar nazar aa libaas-e-majaaz mein
ki hazaaron sajde taDap rahe hain miri jabin-e-niyaaz mein

barsaat kaa baadal to divaana hai kyaa jaane
kis raah se bachnaa hai kis chhat ko bhigonaa hai

rishton kaa e'tibaar vafaaon kaa intizaar
ham bhi charaagh le ke havaaon mein aae hain

shaikh saahab se rasm-o-raah na ki
shukr hai zindagi tabaah na ki

na tan mein khuun faraaham na ashk aankhon mein
namaaz-e-shauq to vaajib hai be-vuzu hi sahi

abhi to jaag rahe hain charaagh raahon ke
abhi hai duur sahar thoDi duur saath chalo

ab to is raah se vo shakhs guzartaa bhi nahin
ab kis ummid pe darvaaze se jhaanke koi

jaan-sapaari daagh katthaa chunaa hai chashm-e-intizaar
vaaste mehmaan gham ke dil hai biiDaa paan kaa

guzar jaa aql se aage ki ye nuur
charaagh-e-raah hai manzil nahin hai!

jaantaa hai ki vo na aaeinge
phir bhi masruf-e-intizaar hai dil

maqaam 'faiz' koi raah mein jachaa hi nahin
jo ku-e-yaar se nikle to su-e-daar chale