Ghazal

"ye daastaan-e-dil hai kyaa ho adaa zabaan se aansu Tapak rahe hain lafzein milein kahaan se hai rabt do dilon ko be-rabti-e-bayaan se kuchh vo kahein nazar se kuchh ham kahein zabaan se ye rote rote hansnaa tartib-e-zikr-e-gham hai aayaa huun ibtidaa par chheDaa thaa darmiyaan se haasil to zindagi kaa thi zindagi yahin ki ab main huun ik janaaza uThvaa do aastaan se is tul-e-khaamushi kaa zor-e-bayaan bhi dekhaa thi baat mere dil ki nikli tiri zabaan se jab husn khud-numaa hai aur ishq rakhna-afgan is kashmakash mein parda niklegaa darmiyaan se maidaan-e-imtihaan mein ai be-gharaz mohabbat dil ki zamin tu ne Takraa di aasmaan se us raazdaar-e-gham ki haalat na puchh jis ko kahnaa to hai bahut kuchh mahrum hai zabaan se ai jazb-e-shauq-e-manzil mamnun-e-ghair kyuun hon khud raasta badal kar bichhDaa huun kaarvaan se har gaam par ThiThaknaa har baar muD ke taknaa o muskuraane vaale kyaa le chalaa yahaan se zaahir fareb-e-vaada phir e'tibaar itnaa vo likh gayaa dilon par jo kah diyaa zabaan se aaankhon se baaghbaan ki shoale nikle rahe hain tinke dabaae munh mein niklaa huun aashiyaan se dil kaa sakun ganvaa kar hon aarzu pashemaan kuchh le ke rakh na chhoDaa kyuun jins-e-raaegaan se"

"jitnaa thaa sargarm-e-kaar utnaa hi dil naakaam thaa hosh jis kaa naam hai vo bhi junun-e-khaam thaa hosh kaa zaamin thaa saaqi kaif-parvar dil kaa shauq jaam thaa paas aur be-andesha-e-anjaam thaa khatm karti jald kyunkar ziist ki manzil ko saans pher koson kaa thaa lekin faasla ik gaam thaa josh-e-shorida-sari thaa taa-ba-vahm-e-ikhtiyaar thak ke dam TuuTaa to phir aaraam hi aaraam thaa ab kahaan vo aamad-o-raft-e-nafas ki shaah-raah ik kashaakash thi ki jis kaa zindagaani naam thaa chaunk kar khud manzar-e-hasti se aankhein pher liin hichkiyaan kaahe ko thiin poshida ik paighaam thaa gul huaa aakhir bhaDak kar shoala-e-josh-e-shabaab thi kaf-e-mauj-e-havaadis aur charaagh-e-shaam thaa be-jale kis tarah bantaa shama parvaane kaa dil vo use anjaam kyaa dete jo meraa kaam thaa tum ne khud naakaam rakh ke us ki himmat ki thi past aarzu-e-be-gunah par muft kaa ilzaam thaa"

"mujh ko dil qismat ne us ko husn-e-ghaarat-gar diyaa chuur kar de kyuun na vo shisha jise patthar diyaa us se taalib huun diyat kaa aap se matlab nahin jis ne gardan ek ko di ek ko khanjar diyaa thaa mukaafaat-e-amal ahbaab kaa husn-e-amal ye bhi aisaa qarz thaa jo aur se le kar diyaa ab na hai fikr-e-hifaazat aur na ziq-e-raf-e-kaar dene vaale ne diyaa aur meri khvaahish bhar diyaa girya-e-be-ikhtiyaar-e-gham bhi thaa fitri ilaaj jis ne thoDe josh ko har martaba kam kar diyaa jis mein kaif-e-gham nahin baaz aae aise dil se ham ye bhi duniyaa hai koi mai to na di saaghar diyaa 'aarzu' ik roz Dhaa detaa mujhe meraa hi zor ye bhi us ki kaarsaazi dil mein jis ne Dar diyaa"

"tumhein kyaa kaam naalon se tumhein kyaa kaam aahon se chhupaayaa ho gunaah-e-ishq to puchho gavaahon se main kajkol-e-dil-e-be-muddaaa le kar kahaan jaaun ye paighaam-e-talab kyuun unchi unchi baargaahon se zabaan ho ek ulfat ki to mumkin hai zabaan-bandi hui jo baat chupke ki vo kah Daali nigaahon se mohabbat andar andar ziist kaa naqsha palaTti hai yahi chalti hui saansein badal jaaeingi aahon se sanad be-aitmaadi ki hai qabl-e-imtihaan goyaa bayaan-e-haal kai pahle halaf lenaa gavaahon se mohabbat nek-o-bad ko sochne de ghair mumkin hai baDhi jab be-khudi phir kaun Dartaa hai gunaahon se hue jab aap se baahar phir ehsaas-e-dui kaisaa pata manzil kaa miltaa hai inhin gum-karda raahon se bataa sakti nahin ruidgi-e-sabza-o-gul bhi faqiron se paTe the ye gaDhe yaa baadshaahon se chhalakte zarf kaa khultaa bharam khotaa hai baat apni sukun paataa hai dil kaa dard naalon se na aahon se ye pahle soch lein aankhon mein lahraate hue aansu ki vo phir uTh bhi sakte hain jo gir jaaein nigaahon se milaa baiThaa hai sab mein kuchh magar munh se nahin kahtaa alag samjho tum apne 'aarzu' ko daad-khvaahon se"

"dil mein yaad-e-but-e-be-pir liye baiThaa huun yaani ik zulm ki tasvir liye baiThaa huun aah mein dard ki taasir liye baiThaa huun dil mein ik khuun bharaa tiir liye baiThaa huun ik zaraa si khalish-e-dard-e-jigar par ye ghamanD jaise kul ishq ki jaagir liye baiThaa huun hai mujhe saaz-e-tarab sokhta-saamaani-e-dil parda-e-khaak mein iksir liye baiThaa huun chuur shishe pe nazar paDte hi dil yaad aayaa miTne vaale tiri tasvir liye baiThaa huun qaid ko toD ke samjhaa ki sahaaraa toDaa haath mein paanv ki zanjir liye baiThaa huun 'aarzu' ho chuki sau martaba duniyaa bedaar aur main soi hui taqdir liye baiThaa huun"

"aaj be-aap ho gae ham bhi aap ko paa ke kho gae ham bhi daane kam the dukhon ki simran mein thoDe moti piro gae ham bhi der se the vo jis ke ghere mein usi jhurmuT mein kho gae ham bhi jaa kai DhunDaa kahaan kahaan na tumhein jab na paayaa to kho gae ham bhi naam jiine kaa jaagnaa rakh kar aaj be niind so gae ham bhi roeinge gar to jag-hansaai ho karte kyaa chup se ho gae ham bhi haae re 'aarzu' ki be-aasi aap be-bas the ro gae ham bhi"

"jo but hai yahaan apni jaa ek hi hai dui chhoD bande khudaa ek hi hai ye gul khil rahaa hai vo murjhaa rahaa hai asar do tarah ke havaa ek hi hai hain apni hi niyyat ke phal talkh-o-shirin vagarna maza dard kaa ek hi hai bhare rang jitne badaltaa zamaana magar ishq kaa maajraa ek hi hai sabhi shikve miTte hain chashm-e-karam se maraz hon hazaaron davaa ek hi hai do-rangi-e-duniyaa se kyaa kaam ham ko ki firdaus-e-dil ki fazaa ek hi hai banaate hain be-khud sabhi husn vaale Thikaane alag raasta ek hi hai koi samjhe naghma koi samjhe naala mire saaz-e-dil ki sadaa ek hi hai vo daar-o-rasan hon ki hon zahr-o-khanjar bahaane hazaaron qazaa ek hi hai mohabbat kare aur ho be-gharaz bhi lo phir 'aarzu' aap kaa ek hi hai"

"vo kyaa likhtaa jise inkaar karte bhi hijaab aayaa javaab-e-khat nahin aayaa to ye samjho javaab aayaa qarib-e-subh ye kah kar ajal ne aankh jhapkaa di are o hijr ke maare tujhe ab tak na khvaab aayaa dil is aavaaz ke sadqe ye mushkil mein kahaa kis ne na ghabraanaa na ghabraanaa main aayaa aur shitaab aayaa koi qattaal-surat dekh li marne lage us par ye maut ik khushnumaa parde mein aai yaa shabaab aayaa puraane 'ahd TuuTe ho gae paimaan nae qaaem banaa di us ne duniyaa dusri jo inqalaab aayaa guzargaah-e-mohabbat ban gai ik mustaqil basti lagaa kar aag aayaa ghar ko jo khaana-kharaab aayaa mu'amma ban gayaa raaz-e-mohabbat 'aarzu' yunhi vo mujh se puchhte jhijhke mujhe kahte hijaab aayaa"

"dil mukaddar hai aaina-ru kaa na milaa rang se pataa bu kaa hai dam-e-subh vo khumaarin aankh ek TuuTaa tilism jaadu kaa kam jo Thahre jafaa se meri vafaa to ye pasang hai taraazu kaa dil ki bechainiyaan khudaa ki panaah takiya haT haT gayaa hai pahlu kaa kahin jaati bahaar rukti hai daaman aayaa na haath mein bu kaa hai nai qaid ab ye aazaadi zor TuuTaa huaa hai baazu kaa aandhi aahon ki sail ashkon ki ab nahin koi apne qaabu kaa qahqaha bharti hai suraahi kyaa zarf khum se sivaa hai chullu kaa soti qismat ki niind uDaavegaa narm takiya kisi ke zaanu kaa ishq-baazi hai jaan ki jokham vahin maaraa paDaa jahaan chukaa 'aarzu' dil hai vaqf-e-bim-o-umid jhilmilaataa charaagh jugnu kaa"

"yuun duur duur dil se ho ho ke dil-nashin bhi hain to isi jahaan mein milte nahin kahin bhi kam ek qabr se hai mujh ko ye kul zamin bhi mar rahne kaa Thikaanaa miltaa nahin kahin bhi tufaan-e-bahr khud hain baDhti umangein dil ki kashti qaraar legi ho kar na tah-nashin bhi imkaan ki had ke andar koshish ki had se baahar dil jis ko DhunDhtaa hai vo hai bhi aur nahin bhi ummid-e-dil ki fitrat hai be-niyaaz taskin kam ho na be-qaraari aae agar yaqin bhi bim-o-rajaa se dil mein dariyaa kaa jazr-o-mad hai saahil-navaaz maujein aaiin bhi aur gaiin bhi ye multafit nigaahein sheva vighaa hai jin kaa hain mojib-e-sukun bhi hangaama-aafrin bhi kar pahle dil pe qaabu jaame ki phir khabar le daaman bachaane vaale jaati hai aastin bhi khatre mein jaan jis se vo jaan se bhi pyaaraa rangin-ezaar shoala qaatil bhi hai hasin bhi sar-gashta-e-mohabbat daar-e-mehan mein phir kar dekh aae gosha gosha raahat nahin kahin bhi nairangi-e-talavvun laa-hal saa ik muamma samjhe jo tere tevar paDh le khat-e-jabin bhi shaan-e-ghurur un ki tasvir ik rukhi hai aur aarzu ki nazrein shaidaa bhi hain hasin bhi"

"mire josh-e-gham ki hai ajab kahaani kabhi uThtaa shoala kabhi bahtaa paani hai khushi kaa saudaa khalish-e-nihaani hai jigar kaa chhaalaa samar-e-javaani jo khushi hai faani to hai gham bhi faani na ye jaavedaani na vo jaavedaani azali mohabbat abadi kahaani ki pas-e-fanaa hai nai zindagaani sitam-o-razaa mein ye hai ahd-e-mohkam jo tiri kahaani vo mari kahaani vo uTheinge tufaan ki khudaa bachaae ye nae nazaare ye bhari javaani ye nigaah tirchhi ye bal abruon kaa har adaa hai dilkash magar imtihaani miri kashti-e-dil dam-e-aah-o-afghaan kabhi baadbaani to kabhi dahaani dar-e-dil se palTaa har ik aane vaalaa tiri yaad kyaa thi miri paasbaani ye tiraa talavvun ye badalti chitvan ajab ik balaa hai ki hai naa-gahaani miri kisht-e-dil par pa-e-zhaala-baari hai saped baadal aqab-e-javaani kabhi aarzu thaa yahi daagh-e-hasrat mujhe jo banaa de tiri mehrbaani"

"us ki to ek dil-lagi apnaa banaa ke chhoD de jaae vo ab kahaan jise sab se chhuDaa ke chhoD de khel nahin hai bad-gumaan qaul-o-qaraar bhulnaa phir se aazmaa ke dekh yaad dilaa ke chhoD de nibh chukaa zindagi kaa saath jab ye abhi se haal hai bojh baTaane vaalaa hi biich mein laa ke chhoD de us se kahein to kyaa kahein jis ke mizaaj mein ye zid jab na lagi bujhaa sake aag lagaa ke chhoD de raah tavil paanv shal aur ye ham-safar kaa haal le to chale sambhaal ke biich mein laa ke chhoD de"

"phir chaahe to na aanaa o aan-baan vaale jhuTaa hi vaada kar le sachchi zabaan vaale maujud dil jigar hain de abruon ko jumbish dohra nishaana bhi hai dohri kamaan vaale ye chupke chupke baatein nazrein bachaa bachaa kar rakhte hain aankh ham bhi ham bhi hain kaan vaale kahnaa pate pate ki aur naam phir hansi kaa chhuriyaan na bhonk dil mein miThi zabaan vaale vo 'aarzu' sar apnaa Takraa rahaa hai dar se niche to dekh jhuk kar unche makaan vaale"

"yahi ik nibaah ki shakl hai vo jafaa karein main vafaa karun agar is pe bhi na nibhi to phir mire kirdgaar main kyaa karun hai mohabbat aisi bandhi girah jo na ek haath se khul sake koi ahd toDe kare daghaa miraa farz hai ki vafaa karun main hazaar baaton mein ek bhi kabhi un se khul ke na kah sakaa agar ek tarah ki baat ho to hazaar tarah adaa karun jo hansaa to surat-e-zakhm-e-dil ki lahu ke qatre Tapak paDe main sitam-rasida huun 'aarzu' na bahaaun ashk to kyaa karun"

"kisi gumaan-o-yaqin ki had mein vo shokh-e-parda-nashin nahin hai jahaan na samho usi jagah hai jahaan samajh lo vahin nahin hai tumhaaraa vaada hai kaisaa vaada ki jis kaa dil ko yaqin nahin hai nagin-e-be-naqsh to hazaaron ye naqsh hai aur nagin nahin hai tasavvuron ke fareb uThaa kar mushaahida vahm ban rahaa hai nazar ne khaae hain itne dhoke ki dekh kar bhi yaqin nahin hai talavvun ik jazr-o-mad hai khud hi thapeDon mein aa phansi hai kashti khabar hai muddat ke Duube dil ki ki aaj tak tah-nashin nahin hai ye kahti hai gardish-e-zamaana qadam thameinge na ab kisi jaa hai ye bhi ik aasmaan kaa TukDaa tiri gali ki zamin nahin hai vafaa ki haami hamiyyat un ki harif-e-ummid ghairat un ki nigaahein iqraar kar rahi hain zabaan pe lekin nahin nahin hai huaa jo ik dil kaa daagh raushan to ho gae kul charaagh raushan khayaal raushan dimaagh raushan bas ab andheraa kahin nahin hai sarishk-e-khunin kaa kul fasaana lapeT rakhaa hai ik varaq mein nichoDne par lahu na Tapke to aastin aastin nahin hai hamaari naakaami-e-vafaa ne zamaane ki khol di hain aankhein charaagh kab kaa bujhaa paDaa hai magar andheraa kahin nahin hai mujhi pe kyaa hai nahin hai kis mein ye but-taraashi ye but-parasti agar na husn-e-nazar se dekho to koi bhi phir hasin nahin hai rah-e-itaaat mein 'aarzu' ne qadam qadam pe kiye hain sajde jo aap kaa naqsh-e-paa nahin hai vo us kaa naqsh-e-jabin nahin hai"

"jahaan ki hai jurm ek nigaah karnaa vahin hai gunah pe DaT ke gunaah karnaa buton se baDhaa ke mel nibaah karnaa jahaan ke safed ko he siyaah karnaa sikhaayaa hai mujh ko is miri be-kasi ne usi ko sitam kaa us ke gavaah karnaa lubhaane se dil ke thaa to ye muddaaa thaa gharib ki zindagi ko tabaah karnaa yahi to hai haan yahi vo adaa-e-maasum alag hui jo sikhaa ke gunaah karnaa jafaa se bhi lein maza na vafaa kaa kyunkar hamein to har ik tarah hai nibaah karnaa ye kahtaa hai chashm-e-hosh-rubaa kaa jaadu tujhe tire haath se hai tabaah karnaa tiri nazar se sikhaa hai aah-e-dil ne jigar mein shigaaf Daal ke raah karnaa nazar mein nazar gaDaae hai yuun vo zaalim ki 'aarzu' ab kaThin hai ik aah karnaa"

"duur the hosh-o-havaas apne se bhi begaana thaa un ko bazm-e-naaz thi aur mujh ko khalvat-khaana thaa khinch laayaa thaa ye kis aalam se kis aalam mein hosh apnaa haal apne liye jaise koi afsaana thaa chhoTe chhoTe do varaq jal jal ke daftar ban gae dars-e-hasrat de rahaa thaa jo par-e-parvaana thaa jaan kar vaarafta un ke chheDne ki der thi phir to dil ik hosh mein aayaa huaa divaana thaa zau-fishaan hone lagaa jab dil mein husn-e-khud-numaa phir to kaaba 'aarzu' kaaba na thaa but-khaana thaa"

"maasum nazar kaa bholaa-pan lalchaa ke lubhaanaa kyaa jaane dil aap nishaana bantaa hai vo tiir chalaanaa kyaa jaane kah jaati hai kyaa vo chin-e-jabin ye aaj samajh sakte hain kahin kuchh sikhaa huaa to kaam nahin dil naaz uThaanaa kyaa jaane chaTki jo kali koyal kuuki ulfat ki kahaani khatm hui kyaa kis ne kahi kyaa kis ne suni ye bataa zamaana kyaa jaane thaa dair-o-haram mein kyaa rakhaa jis samt gayaa Takraa ke phiraa kis parde ke pichhe hai shoala andhaa parvaana kyaa jaane ye zoraa-zori ishq ki thi fitrat hi jis ne badal Daali jaltaa huaa dil ho kar paani aansu ban jaanaa kyaa jaane sajdon se paDaa patthar mein gaDhaa lekin na miTaa maathe kaa likhaa karne ko gharib ne kyaa na kiyaa taqdir banaanaa kyaa jaane aankhon ki andhi khud-gharzi kaahe ko samajhne degi kabhi jo niind uDaa de raaton ki vo khvaab mein aanaa kyaa jaane patthar ki lakir hai naqsh-e-vafaa aaina na jaano talvon kaa lahraayaa kare rangin-shoala dil palTe khaanaa kyaa jaane jis naale se duniyaa bekal hai vo jalte dil ki mashal hai jo pahlaa luukaa khud na sahe vo aag lagaanaa kyaa jaane ham 'aarzu' aae baiThe hain aur vo sharmaae baiThe hain mushtaaq-nazar gustaakh nahin parda sarkaanaa kyaa jaane"

"kis mast adaa se aankh laDi matvaalaa banaa lahraa ke giraa aage to hain raahein aur kaThin dil pahle hi Thokar khaa ke giraa aage jo baDhaa tharraae qadam vo hans jo diye sharmaa ke giraa behosh nahin hoshyaar thaa main uThne kaa sahaaraa paa ke giraa dil shauq ke josh mein dauD chalaa aur josh to hotaa hai andhaa dar band paDaa thaa qismat kaa Takkar jo lagi teyoraa ke giraa jitni bhi dil ki zarurat thi bas utni hi himmat-o-taaqat thi raste ki khakheDein jhel gayaa paas aate hi main chakraa ke giraa kyaa ishq ki manzil bhi hai kaDi bandh bandh kar himmat TuuT gai jo ek qadam chal kar sambhlaa vo do qadam aage jaa ke giraa sulgi hui hai gham ki bhaTTi dil kyuun na pighal ke bane paani jo qatra aansu ho ke bahaa lahraa ke chalaa teyoraa ke giraa vo naala falak se Takraayaa vo 'aarzu' ik taaraa TuuTaa dushman ki taraf jo lapkaa thaa shoala vo mujhi par aa ke giraa"

"har saans hai ik naghma har naghma hai mastaana kis darja dukhe dil kaa rangin hai afsaana jo kuchh thaa na kahne kaa sab kah gayaa divaana samjho to mukammal hai ab 'ishq kaa afsaana do zindagiyon kaa hai chhoTaa saa ye afsaana lahraayaa jahaan sho'la andhaa huaa parvaana in ras bhari aankhon se masti jo Tapakti hai hoti hai nazar saaqi dil bantaa hai paimaana viraane mein divaana ghar chhoD ke aayaa thaa jab hogaa na divaana ghar DhunDhegaa viraana afsaana gham-e-dil kaa sunne ke nahin qaabil kah dete hain sab hans kar divaana hai divaana jab 'ishq ke maaron kaa pursaan hi nahin koi phir donon baraabar hain basti ho ki viraana ye aag mohabbat ki paani se nahin bujhti phir sham' se jaa lipTaa jaltaa huaa parvaana"

"qurbat baDhaa baDhaa kar be-khud banaa rahe hain main duur haT rahaa huun vo paas aa rahe hain eajaaz-e-paak-baazi hairat mein laa rahe hain dil mil gayaa hai dil se pahlu judaa rahe hain vo dil se gham bhulaa kar dil ko lubhaa rahe hain guzre hue zamaane phir phir ke aa rahe hain siine mein zabt-e-gham se chhaalaa ubhar rahaa hai sho'le ko band kar ke paani banaa rahe hain ai be-khudi kahaan hai jaldi miri khabar le bhule the jo ba-mushkil phir yaad aa rahe hain lein kaam zabt se kyaa ulTaa hai dil kaa phoDaa utnaa ubhar rahaa hai jitnaa dabaa rahe hain furqat mein saaz-e-raahat saamaan 'azaab kaa hai ThanDi havaa ke jhonke kyaa ji jalaa rahe hain hain husn ke karishme kyaa inqalaab-aagin gham-khvaar jo the kal tak ab khaar khaa rahe hain khud in ki justuju mein ham duur bhaage varna vo kab alag rahe hain vo kab judaa rahe hain le le ke ThanDi saansein puchho na haal dekho tum bhed kholte ho aur ham chhupaa rahe hain dekh 'aarzu' ye ronaa shaana hilaa hilaa kar tu aaj khvaab mein hai aur vo jagaa rahe hain"

"taqdir pe shaakir rah kar bhi ye kaun kahe tadbir na kar vaa baab-e-ijaabat ho ki na ho zanjir hilaa taakhir na kar gham baDhne de ai dil aur zaraa jaanch aah ki be-taasir na kar hai khvaab adhuraa aap abhi be-samjhe ghalat taabir na kar jab zulm kaa badla zulm huaa mazlum kaa haq kuchh bhi na rahaa de dard hi mein lazzat yaarab naale ko ataa taasir na kar ho laakh kamaan kaDi qaatil kuchh jazb nishaane mein bhi hai baazu ke bal pe nazar kar ke andaaza-e-zakhm-e-tir na kar ab tak jo nigaahein sidhi hain mumkin hai kal ye palaT jaaein jo karnaa ho kare aise mein kis soch mein hai taakhir na kar paimaan-e-mohabbat khatm huaa ab zikr se us ke faaeda kyaa munh bikhri kaDiyon ke na milaa tayyaar nai zanjir na kar ulfat ke ahd-e-mohkam mein buude kaaghaz ki zamaanat kyaa ye dil se dil ki baatein hain rakh yaad faqat tahrir na kar har dil hai hayaat kaa sarmaaya har dil mein josh mohabbat kaa tu 'aarzu' aur kahegaa kyaa bas rahne bhi de taqrir na kar"

"bhole ban kar haal na puchho bahte hain ashk to bahne do jis se baDhe bechaini dil ki aisi tasalli rahne do rasmein is andher-nagar ki nai nahin ye puraani hain mehr pe Daalo raat kaa parda maah ko raushan rahne do ruuh nikal kar baagh-e-jahaan se baagh-e-jinaan mein jaa pahunche chehre pe apne meri nigaahein itni der to rahne do khanda-e-gul bulbul mein hogaa gul mein naghma bulbul kaa qissa ek zabaanein do hain aap kaho yaa kahne do itnaa junun-e-shauq diyaa kyuun khauf jo thaa rusvaai kaa baat karo khud qaabil-e-shikva ulTe mujh ko rahne do"

"taDapte dil ko na le iztiraab letaa jaa paTak de saaghar-e-khaali sharaab letaa jaa vo haath maar palaT kar jo kar de kaam tamaam baDe 'azaab mein huun main savaab letaa jaa vo ban hi ghar se hai achchhaa sukun jis mein mile mujhe bhi o dil-e-khaana-kharaab letaa jaa mile ik aah kaa vaqfa to vaqt-e-purshish-e-haal har ik savaal kaa apne javaab letaa jaa naqaab uThaa ke kiyaa saamnaa to munh ko na pher dikhaa ke khvaab na aankhon se khvaab letaa jaa"