Ghazal

"aqaaed vahm hain mazhab khayaal-e-khaam hai saaqi azal se zehn-e-insaan basta-e-auhaam hai saaqi haqiqat-aashnaai asl mein gum-karda raahi hai urus-e-aagahi parvurda-e-ibhaam hai saaqi mubaarak ho zaifi ko khirad ki falsafa-raani javaani be-niyaaz-e-ibrat-e-anjaam hai saaqi havas hogi asir-e-halqa-e-nek-o-bad-e-aalam mohabbat maavaraa-e-fikr-e-nang-o-naam hai saaqi abhi tak raaste ke pech-o-kham se dil dhaDaktaa hai miraa zauq-e-talab shaayad abhi tak khaam hai saaqi vahaan bhejaa gayaa huun chaak karne parda-e-shab ko jahaan har subh ke daaman pe aks-e-shaam hai saaqi mire saaghar mein mai hai aur tire haathon mein barbat hai vatan ki sar-zamin mein bhuuk se kohraam hai saaqi zamaana barsar-e-paikaar hai pur-haul shoalon se tire lab par abhi tak naghma-e-khayyaam hai saaqi"

"fan jo naadaar tak nahin pahunchaa abhi meayaar tak nahin pahunchaa us ne bar-vaqt be-rukhi barti shauq aazaar tak nahin pahunchaa aks-e-mai ho ki jalva-e-gul ho rang-e-rukHsaar tak nahin pahunchaa harf-e-inkaar sar buland rahaa zoaf-e-iqraar tak nahin pahunchaa hukm-e-sarkaar ki pahunch mat puchh ahl-e-sarkaar tak nahin pahunchaa adl-gaahein to duur ki shai hain qatl akhbaar tak nahin pahunchaa inqilaabaat-e-dahr ki buniyaad haq jo haqdaar tak nahin pahunchaa vo masihaa-nafas nahin jis kaa silsila-daar tak nahin pahunchaa"

"paanv chhu lene do phulon ko ‘inaayat hogi varna ham ko nahin un ko bhi shikaayat hogi aap jo phuul bichhaaein unhein ham Thukraaein ham ko Dar hai ki ye tauhin-e-mohabbat hogi dil ki bechain umangon pe karam farmaao itnaa ruk ruk ke chalogi to qayaamat hogi sharm roke hai udhar shauq idhar khinche hai kyaa khabar thi kabhi is dil ki ye haalat hogi sharm ghairon se huaa karti hai apno se nahin sharm ham se bhi karoge to musibat hogi"

"jurm-e-ulfat pe hamein log sazaa dete hain kaise naadaan hain shoalon ko havaa dete hain ham se divaane kahin tark-e-vafaa karte hain jaan jaae ki rahe baat nibhaa dete hain aap daulat ke taraazu mein dilon ko taulein ham mohabbat se mohabbat kaa sila dete hain takht kyaa chiiz hai aur laal-o-javaahar kyaa hain ishq vaale to khudaai bhi luTaa dete hain ham ne dil de bhi diyaa ahd-e-vafaa le bhi liyaa aap ab shauq se de lein jo sazaa dete hain"

"apnaa dil pesh karun apni vafaa pesh karun kuchh samajh mein nahin aataa tujhe kyaa pesh karun tere milne ki khushi mein koi naghma chheDun yaa tire dard-e-judaai kaa gilaa pesh karun mere khvaabon mein bhi tu mere khayaalon mein bhi tu kaun si chiiz tujhe tujh se judaa pesh karun jo tire dil ko lubhaae vo adaa mujh mein nahin kyuun na tujh ko koi teri hi adaa pesh karun"

"jab kabhi un ki tavajjoh mein kami paai gai az-sar-e-nau daastaan-e-shauq dohraai gai bik gae jab tere lab phir tujh ko kyaa shikva agar zindagaani baada o saaghar se bahlaai gai ai gham-e-duniyaa tujhe kyaa ilm tere vaaste kin bahaanon se tabiat raah par laai gai ham karein tark-e-vafaa achchhaa chalo yuun hi sahi aur agar tark-e-vafaa se bhi na rusvaai gai kaise kaise chashm o aariz gard-e-gham se bujh gae kaise kaise paikaron ki shaan-e-zebaai gai dil ki dhaDkan mein tavaazun aa chalaa hai khair ho meri nazrein bujh gaiin yaa teri raanaai gai un kaa gham un kaa tasavvur un ke shikve ab kahaan ab to ye baatein bhi ai dil ho gaiin aai gai jurat-e-insaan pe go taadib ke pahre rahe fitrat-e-insaan ko kab zanjir pahnaai gai arsa-e-hasti mein ab tesha-zanon kaa daur hai rasm-e-changezi uThi tauqir-e-daaraai gai"

"mohabbat tark ki main ne garebaan si liyaa main ne zamaane ab to khush ho zahr ye bhi pi liyaa main ne abhi zinda huun lekin sochtaa rahtaa huun khalvat mein ki ab tak kis tamannaa ke sahaare ji liyaa main ne unhein apnaa nahin saktaa magar itnaa bhi kyaa kam hai ki kuchh muddat hasin khvaabon mein kho kar ji liyaa main ne bas ab to daaman-e-dil chhoD do bekaar ummido bahut dukh sah liye main ne bahut din ji liyaa main ne"

"duur rah kar na karo baat qarib aa jaao yaad rah jaaegi ye raat qarib aa jaao ek muddat se tamannaa thi tumhein chhune ki aaj bas mein nahin jazbaat qarib aa jaao sard jhonkon se bhaDakte hain badan mein shoale jaan le legi ye barsaat qarib aa jaao is qadar ham se jhijakne ki zarurat kyaa hai zindagi bhar kaa hai ab saath qarib aa jaao"

"chehre pe khushi chhaa jaati hai aankhon mein surur aa jaataa hai jab tum mujhe apnaa kahte ho apne pe ghurur aa jaataa hai tum husn ki khud ik duniyaa ho shaayad ye tumhein maalum nahin mahfil mein tumhaare aane se har chiiz pe nuur aa jaataa hai ham paas se tum ko kyaa dekhein tum jab bhi muqaabil hote ho betaab nigaahon ke aage parda saa zarur aa jaataa hai jab tum se mohabbat ki ham ne tab jaa ke kahin ye raaz khulaa marne kaa saliqa aate hi jiine kaa shuur aa jaataa hai"

"ye zulf agar khul ke bikhar jaae to achchhaa is raat ki taqdir sanvar jaae to achchhaa jis tarah se thoDi si tire saath kaTi hai baaqi bhi usi tarah guzar jaae to achchhaa duniyaa ki nigaahon mein bhalaa kyaa hai buraa kyaa ye bojh agar dil se utar jaae to achchhaa vaise to tumhin ne mujhe barbaad kiyaa hai ilzaam kisi aur ke sar jaae to achchhaa"

"jivan ke safar mein raahi milte hain bichhaD jaane ko aur de jaate hain yaadein tanhaai mein taDpaane ko ye ruup ki daulat vaale kab sunte hain dil ke naale taqdir na bas mein Daale in ke kisi divaane ko jo in ki nazar se khele dukh paae musibat jhele phirte hain ye sab albele dil le ke mukar jaane ko dil le ke daghaa dete hain ik rog lagaa dete hain hans-hans ke jalaa dete hain ye husn ke parvaane ko ab saath na guzreinge ham lekin ye fazaa raaton ki dohraayaa karegi har-dam is pyaar ke afsaane ko ro-ro ke inhin raahon mein khonaa paDaa ik apne ko hans-hans ke inhin raahon mein apnaayaa thaa begaane ko tum apni nai duniyaa mein kho jaao paraae ban kar ji paae to ham ji leinge marne ki sazaa paane ko"

"kabhi khud pe kabhi haalaat pe ronaa aayaa baat nikli to har ik baat pe ronaa aayaa ham to samjhe the ki ham bhuul gae hain un ko kyaa huaa aaj ye kis baat pe ronaa aayaa kis liye jiite hain ham kis ke liye jiite hain baarhaa aise savaalaat pe ronaa aayaa kaun rotaa hai kisi aur ki khaatir ai dost sab ko apni hi kisi baat pe ronaa aayaa"

"simTi hui ye ghaDiyaan phir se na bikhar jaaein is raat mein ji le ham is raat mein mar jaaein ab subh na aa paae aao ye duaa maangein is raat ke har pal se raatein hi ubhar jaaein duniyaa ki nigaahein ab ham tak na pahunch paaein taaron mein basein chal kar dharti mein utar jaaein haalaat ke tiron se chhalni hain badan apne paas aao ki sinon ke kuchh zakhm to bhar jaaein aage bhi andheraa hai pichhe bhi andheraa hai apni hain vahi saansein jo saath guzar jaaein bichhDi hui ruhon kaa ye mail suhaana hai is mail kaa kuchh ehsaan jismon pe bhi kar jaaein tarse hue jazbon ko ab aur na tarsaao tum shaane pe sar rakh do ham baahon mein bhar jaaein"

"kyaa jaanein tiri ummat kis haal ko pahunchegi baDhti chali jaati hai taadaad imaamon ki har gosha-e-maghrib mein har khitta-e-mashriq mein tashrih digar-gun hai ab tere payaamon ki vo log jinhein kal tak daavaa thaa rifaaqat kaa tazlil pe utre hain apnon hi ke naamon ki bigDe hue tevar hain nau-umr siyaasat ke biphri hui saansein hain nau-mashq nizaamon ki tabqon se nikal kar ham firqon mein na baT jaaein ban kar na bigaD jaae taqdir ghulaamon ki"

"chhu lene do naazuk honTon ko kuchh aur nahin hai jaam hai ye qudrat ne jo ham ko bakhshaa hai vo sab se hasin inaam hai ye sharmaa ke na yunhi kho denaa rangin javaani ki ghaDiyaan betaab dhaDakte sinon kaa armaan bharaa paighaam hai ye achchhon ko buraa saabit karnaa duniyaa ki puraani aadat hai is mai ko mubaarak chiiz samajh maanaa ki bahut badnaam hai ye"

"khuddaariyon ke khuun ko arzaan na kar sake ham apne jauharon ko numaayaan na kar sake ho kar kharaab-e-mai tire gham to bhulaa diye lekin gham-e-hayaat kaa darmaan na kar sake TuuTaa tilism-e-ahd-e-mohabbat kuchh is tarah phir aarzu ki shama firozaan na kar sake har shai qarib aa ke kashish apni kho gai vo bhi ilaaj-e-shauq-e-gurezaan na kar sake kis darja dil-shikan the mohabbat ke haadse ham zindagi mein phir koi armaan na kar sake maayusiyon ne chhin liye dil ke valvale vo bhi nashaat-e-ruh kaa saamaan na kar sake"

"is taraf se guzre the qaafile bahaaron ke aaj tak sulagte hain zakhm rahguzaaron ke khalvaton ke shaidaai khalvaton mein khulte hain ham se puchh kar dekho raaz parda-daaron ke gesuon ki chhaanv mein dil-navaaz chehre hain yaa hasin dhundlakon mein phuul hain bahaaron ke pahle hans ke milte hain phir nazar churaate hain aashnaa-sifat hain log ajnabi dayaaron ke tum ne sirf chaahaa hai ham ne chhu ke dekhe hain pairahan ghaTaaon ke jism barq-paaron ke shughl-e-mai-parasti go jashn-e-naa-muraadi thaa yuun bhi kaT gae kuchh din tere sogvaaron ke"

"ahl-e-dil aur bhi hain ahl-e-vafaa aur bhi hain ek ham hi nahin duniyaa se khafaa aur bhi hain ham pe hi khatm nahin maslak-e-shorida-sari chaak-e-dil aur bhi hain chaak-e-qabaa aur bhi hain kyaa huaa gar mire yaaron ki zabaanein chup hain mere shaahid mire yaaron ke sivaa aur bhi hain sar salaamat hai to kyaa sang-e-malaamat ki kami jaan baaqi hai to paikaan-e-qazaa aur bhi hain munsif-e-shahr ki vahdat pe na harf aa jaae log kahte hain ki arbaab-e-jafaa aur bhi hain"

"sansaar se bhaage phirte ho bhagvaan ko tum kyaa paaoge is lok ko bhi apnaa na sake us lok mein bhi pachhtaaoge ye paap hai kyaa ye punn hai kyaa riton par dharm ki mohrein hain har yug mein badalte dharmon ko kaise aadarsh banaaoge ye bhog bhi ek tapasyaa hai tum tyaag ke maare kyaa jaano apmaan rachaitaa kaa hogaa rachnaa ko agar Thukraaoge ham kahte hain ye jag apnaa hai tum kahte ho jhuTaa sapnaa hai ham janm bitaa kar jaaeinge tum janm ganvaa kar jaaoge"