Ghazal

"khaDe hain muusaa uThaao pardaa dikhaao tum aab-o-taab-e-aariz hijaab kyuun hai ki khud tajalli bani hui hai hijaab-e-aariz na ruk sakegi ziyaa-e-aariz jo sadd-e-rah ho naqaab-e-aariz vo hogi be-parda rakh ke pardaa ghazab ki chanchal hai taab-e-aariz chhupaa na munh donon haath se yuun taDapti hai barq-e-taab-e-aariz lagaa na de aag ungliyon mein ye garmi-e-iztiraab-e-aariz jo un ko lipTaa ke gaal chumaa hayaa se aane lagaa pasina hui hai boson ki garm bhaTTi khinche na kyuun kar sharaab-e-aariz pari jo dekhe kahe taDap kar jo huur dekhe kahe phaDak kar tumhaaraa gesu javaab-e-gesu tumhaaraa 'aariz javaab-e-aariz huzur ghunghaT uThaa ke aaein baDi chamak kis mein hai dikhaaein idhar rahe aaftaab-e-mahshar udhar rahe aaftaab-e-aariz chhupaanaa kyaa ek kaa thaa manzur aaj tak hain jo chaar mashhur zabur tauret mushaf injil paanchvin hai kitaab-e-aariz na kyuun ho daa'vaa baraabari kaa vahaan milaa til yahaan suvaidaa ye nuqta-e-intikhaab-e-aariz hai vo nuqta-e-intikhaab-e-aariz paDaa huun ghash mein mujhe sunghaa do pasina chehre kaa zulf ki bu nahin hai kam lakhlakhe se mujh ko ye mushk-e-gesu gulaab-e-aariz jo shoala-ru munh chhupaa ke niklaa dhuaan sar-e-raah kuchh kuchh uTThaa lagi vo aatish bane hai jal kar naqaab-e-aariz kabaab-e-aariz na jhepo subh-e-visaal dekho tum aankh se aankh to milaao liye hain gin gin ke main ne bose zabaan par hai hisaab-e-aariz karo na ghusse se laal chehraa bhavon mein Daalo na bal khudaaraa nahin majaal-e-jalaal-e-abru nahin hai taab-e-itaab-e-aariz jo gaal par gaal ham rakheinge shab-e-visaal un ke haath uTheinge tamaanche maareinge pyaar se vo bajeingge chang-o-rubaab-e-aariz kamar ko gardan ko dast-o-lab ko visaal mein lutf de rahaa hai shabaab-e-zaanu shabaab-e-baazu shabaab-e-sina shabaab-e-aariz janaab-e-'maail' ye kudak-e-dil buton ki ulfat mein hogaa kaamil paDhaao quraan ke badle is ko bayaaz-e-gardan kitaab-e-aariz"

"samajh ke huur baDe naaz se lagaai choT jo us ne aaina dekhaa to khud hi khaai choT nazar laDi jo nazar se to dil par aai choT gire kalim sar-e-tur aisi khaai choT labon pe ban gai missi jo dil par aai choT jagah badal ke lagi karne khud-numaai choT baDe dimaagh se maaraa nazar se jab maaraa baDe ghurur se aai jo dil par aai choT kisi kaa tuur pe niklaa hai haath parde se baDaa mazaa ho kare gar tiri kalaai choT ye dauD-dhup laDakpan ki yak qayaamat hai ki Thokaron se qayaamat ne khuub khaai choT abhi uThi na thi nichi nigaah zaalim ki taDap ke dil ne kahaa vo jigar pe aai choT jo aae hashr mein vo sab ko maarte aae jidhar nigaah phiri choT par lagaai choT jo dil kaa aaina mal mal ke ham ne saaf kiyaa phisal phisal ke tumhaari nazar ne khaai choT cluff nahin hai nishaan hai ye chaand-maari kaa hamaare chaand ne lo chaand par lagaai choT ghash aa rahaa hai mujhe zikr-e-lan-taraani se lagi hai dil pe mire lo suni-sunaai choT rukeinge kyaa kaf-e-gustaakh dast-e-rangin se kahin na khaae tiraa panja-e-hinaai choT dil-o-jigar ko bataa kar vo loTnaa meraa vo puchhnaa tiraa kis kis jagah par aai choT mariz-e-hijr ye samjhaa jo chamki charkh pe barq ye aag seinkne laai shab-e-judaai choT uThe taDap ke uThe to gire gire to mare phaDak ke rah gae vo choT par lagaai choT paDegi aah jo meri khuleinge band-e-qabaa shab-e-visaal karegi girah-kushaai choT giraa huun khuld se lanka mein pahle tuur pe baad jahaan jahaan main gayaa saath saath aai choT vo jhaank jhaank ke laDte hain mujh se ye kah kar jo ham ne vaar kiyaa tum ne kyuun bachaai choT jo dard dil mein uThaa un ki yaad khich aai dikhaati hai asar-e-jazb-e-kahrubaai choT uThaa uThaa ke dil-e-muztarib ne de Tapkaa giraa giraa ke mujhe choT par lagaai choT nigaah-e-shokh se jis dam nigaah-e-shauq laDi baDaa hi lutf rahaa ye gai vo aai choT lagaai us ne jo Thokar to ji uThaa 'maail' nikal ke jaan phir aai kuchh aisi khaai choT"

"qibla-e-aab-o-gil tumhin to ho kaaba-e-jaan-o-dil tumhin to ho laa-makaan duur dil bahut nazdik munfasil muttasil tumhin to ho mere pahlu mein dil na kyuun ho khush dil ke pahlu mein dil tumhin to ho tum se mil kar khajil hamin to hain ham se chhuT kar khajil tumhin to ho dil ki sakhti kaa hai gila tum se jis ne rakkhi ye sil tumhin to ho jiite ji mujh ko maar Daalo tum maalik jaan-o-dil tumhin to ho tum ko 'maail' bahut hai sharm-e-gunaah raat-din munfail tumhin to ho"

"vo paara huun main jo aag mein huun vo barq huun jo sahaab mein huun zamin pe bhi iztiraab mein huun falak pe bhi iztiraab mein huun na main havaa mein na khaak mein huun na aag mein huun na aab mein huun shumaar meraa nahin kisi mein agarche main bhi hisaab mein huun agarche paani ki mauj ban kar hamesha main pech-o-taab mein huun vahi huun qatra vahi huun dariyaa jo ain chashm-e-habaab mein huun sulaayaa kis ne gale lagaa kar ki suur bhi thak gayaa jagaa kar bapaa hai aalam mein shor-e-mahshar mujhe jo dekho to khvaab mein huun mazaa hai saaqi tire karam se zuhur meraa hai tere dam se vo baada huun jo huun mai-kade mein vo nashsha huun jo sharaab mein huun ilaahi vo gore gore talve kahin na ho jaaein mujh se maile ki khaak ban kar ba-rang-e-surma hamesha chashm-e-rikaab mein huun jo bhes apnaa badal ke aayaa to rang-e-itlaaq munh se dhoyaa kiyaa hai paani mein qaid mujh ko havaa ki surat habaab mein huun ghazab hai josh-e-zuhur teraa pukaartaa hai ye nuur teraa khudaa ne andhaa kiyaa hai jis ko usi ke aage hijaab mein huun hui hai donon ki ek haalat na chain us ko na chain mujh ko udhar vo hai mahv shokhiyon mein idhar jo main iztiraab mein huun ilaahi mujh par karam ho teraa na khol aamaal-naama meraa pukaartaa hai ye khatt-e-qismat ki main bhi fard-e-hisaab mein huun dimaagh mein huun qadah-kashon ke dahan mein aayaa huun mah-vashon ke nasha vo huun jo sharaab mein huun mazaa vo huun jo kabaab mein huun vo apnaa chehraa agar dikhaae yaqin andhon ko khaak aae pukaarti hai ye be-hijaabi ki main azal se hijaab mein huun alaahada kar ke khud se mujh ko jo tu ne bakhshaa to khaak bakhshaa agarche jannat mujhe mili hai ilaahi phir bhi azaab mein huun hujum nazron kaa hai vo munh par diyaa hai dono ko jis ne dhokaa yaqin ye mujh ko paDaa hai pardaa gumaan ye un ko naqaab mein huun jo mujh ko us se judaa karoge to meraa nuqsaan kyaa karoge nahin huun maanind-e-sifr kuchh bhi agarche main bhi hisaab mein huun na aayaa mar kar bhi chain mujh ko uThaa miri khaak se bagulaa buton kaa gesu to main nahin huun ilaahi kyuun pech-o-taab mein huun jo haal puchho to ik kahaani nishaan puchho to be-nishaani vo zarra huun jo miTaa huaa huun agarche main aaftaab mein huun miTaa agarche mazaar meraa chhuTaa na vo shahsavaar meraa pukaartaa hai ghubaar meraa ki main bhi haazir rikaab mein huun karam ki 'maail' pe bhi nazar ho nazar mein phir chulbulaa asar ho azal se ummid-vaar main bhi ilaahi teri janaab mein huun"

"shab-e-maah mein jo palang par mire saath soe to kyaa hue kabhi lipTe ban ke vo chaandni kabhi chaand ban ke judaa hue hue vaqt-e-aakhiri mehrbaan dam-e-avvalin jo khafaa hue vo abad mein aa ke gale mile jo azal mein ham se judaa hue ye ilaahi kaisaa ghazab huaa vo samaae mujh mein to kyaa hue miraa dil bane to taDap gae miraa sar bane to judaa hue chale saath saath qadam qadam koi ye na samjhaa ki hain baham kabhi dhuup ban ke lipaT gae kabhi saaya ban ke judaa hue abhi hain zamaane se be-khabar rakhaa haath rakkhe ye laash par uTho bas uTho kahaa maan lo miri kyaa khataa jo khafaa hue hain ajiib murgh-e-shikasta-par na chaman mein ghar na qafas mein ghar jo gire to saaya hain khaak par jo uThe to mauj-e-havaa hue vo araq araq hue jis ghaDi mujhe umr-e-khizr ataa hui shab-e-vasl qatre pasine ke mire haq mein aab-e-baqaa hue kabhi shakl-e-aaina ru-ba-ru kabhi tuuti aur kabhi guftugu kabhi shakhs ban ke gale mile kabhi aks ban ke judaa hue na tajalliyaan hain na garmiyaan na sharaartein hain na phurtiyaan hama-tan the din ko to shokhiyaan hama-tan vo shab ko hayaa hue mire naale hain ki azal abad tire ishve hain ki lab-e-masih vahaan kun kaa ghalghala vo bane yahaan qum ki ye jo sadaa hue gire zaat mein to hai jumla-ust uThe jab sifat mein hama-az-dast kahaa kaun ho to mile rahe kahaa naam kyaa to judaa hue kiye us ne bazm mein shoabde mali mehndi haath pe shama ke jo patange raat ko jal gae vo tamaam murgh-e-hinaa hue mire dil ke dekho to valvale ki har ek rang mein jaa mili jo ghaTe to un kaa dahan bane jo baDhe to arz-o-samaa hue vahi farsh-o-arsh-nashin rahe hue naam alag jo kahin rahe gae dair mein to sanam bane gae laa-makaan to khudaa hue jo tasavvur un kaa judaa huaa dil be-khabar ne ye di sadaa abhi ham-baghal the kidhar gae abhi god mein the vo kyaa hue kabhi sozishein kabhi aafatein kabhi ranjishein kabhi raahatein milin chaar ham ko ye neamatein tire ishq mein jo fanaa hue hamein shauq ye ki ho ek taur use zauq ye ki ho shakl aur bane aag to bujhe aab mein mile khaak mein to havaa hue gae sar se jabki vo taa-kamar to alif idhar kaa huaa udhar tiraa joDaa khulte hi baal sab pas-e-pusht aa ke balaa hue koi dab gayaa koi mar gayaa koi pis gayaa koi miT gayaa tire ishve se jab se falak bane tire ghamze jab se qazaa hue mujhe gudgudi se ghash aa gayaa to hilaa ke shaana yahi kahaa abhi hanste the abhi mar gae abhi kyaa the tum abhi kyaa hue kaho kaafiron se karein khushi ki ye masala hai tanaasukhi mire naale khaak mein jab mile to subu ke dast-e-duaa hue pas-e-vasl ham jo sarak gae to vo khilkhilaa ke phaDak gae kahaa shokhiyon ne chalo haTo ki huzur tum se khafaa hue tumhein log kahte hain naujavaan ki ho biis tiis ke darmiyaan kaho mujh se 'maail'-e-khush-bayaan vo tumhaare valvale kyaa hue"

"vo but pari hai nikaalein na baal-o-par taaviz hain donon baazu pe is ke idhar udhar taaviz vo ham nahin jo hon divaane aise kaamon se kise pilaate ho paani mein ghol kar taaviz uThegaa phir na kaleje mein miThaa miThaa dard agar likhe mire dil par tiri nazar taaviz kahaan vo log ki jin ke amal kaa shohraa thaa kuchh is zamaane mein rakhtaa nahin asar taaviz pilaayaa saanp ko paani jo man nikaal liyaa nahaane baiThe hain choTi se khol kar taaviz vahaan gayaa jo koi dil hi bhuul kar aayaa rakhe hain gaaD ke us ne idhar udhar taaviz pas-e-fanaa bhi mohabbat kaa silsila na miTaa tire gale mein hai aur meri qabr par taaviz ye bhed hai ki na murde Darein farishton se banaa ke qabr banaate hain qabr par taaviz ye kyaa ki zulf mein rakkhaa hai baandh kar miraa dil use bhi ghol ke pi jaao jaan kar taaviz jo chaand se hain badan hain vo chaand taaron mein gulon mein haikalein haikal ke taa-kamar taaviz hue hain hazrat-e-'maail' bhi dil mein ab qaail kuchh aisaa likhti hai ai jaan tiri nazar taaviz"

"pyaar apne pe jo aataa hai to kyaa karte hain aaina dekh ke munh chuum liyaa karte hain vasl kaa lutf mujhe vasl se pahle hi milaa jab kahaa yaar ne ghabraa ke ye kyaa karte hain is qadar thaa mujhe ulfat mein bharosaa un par ki jafaa bhi to ye samjhaa ki vafaa karte hain hai yahi arz khudaa se ki fulaan but mil jaae vahi achchhe jo namaazon mein duaa karte hain lab kisi ke jo hile kaan udhar dhyaan udhar dil lagaa kar vo miraa zikr sunaa karte hain subah ko dekh ke aaine mein bose kaa nishaan muskuraate hue honTon mein gilaa karte hain kaise kaise mujhe be-saakhta milte hain khitaab ghussa aataa hai to kyaa kyaa vo kahaa karte hain kyaa huaa mujh ko raqibon ne agar di taazim teri mahfil mein to fitne hi uThaa karte hain kaan baaton ki taraf aankh hai kaamon ki taraf ho ke anjaan miraa zikr sunaa karte hain chiin peshaani pe hai mauj-e-tabassum lab mein aise hansmukh hain ki ghusse mein hansaa karte hain bas to chaltaa nahin kuchh kah ke unhein kyuun hon zalil ham to apnaa hi lahu aap piyaa karte hain is ishaare ke fidaa aise tajaahul ke nisaar maar kar aankh vo munh pher liyaa karte hain jalse hi jalse hain jab se vo hue khud-mukhtaar koi itnaa nahin kahtaa ki ye kyaa karte hain aashiqaana hai aqida bhi hamaaraa 'maail' le ke ham naam-e-butaan zikr-e-khudaa karte hain"

"main hi matlub khud huun tu hai abas aaj se teri justuju hai abas saadgi mein hai laakh laakh banaav aaina tere ru-ba-ru hai abas mujh ko donon se kuchh mazaa na milaa dil abas dil ki aarzu hai abas baad aab aag khaak gard-e-ruh zisht-ruyon mein khub-ru hai abas tur-o-musaa hain zarre zarre mein kab tiraa jalva chaar su hai abas lipTe hain khvaab mein vo dushman se haath yaan zinat-e-gulu hai abas vaah 'maail' khudi mein zikr-e-anaa chup raho tum ye guftugu hai abas"

"aaftaab aae chamak kar jo sar-e-jaam-e-sharaab rind samjhein ki hai saadiq sahar-e-jaam-e-sharaab sab ke haathon pe thaa shab-bhar safar-e-jaam-e-sharaab har khat-e-dast banaa rah-guzar-e-jaam-e-sharaab dukhtar-e-raz pe girein mast patangon ki tarah sham-e-mahfil ho ye lakht-e-jigar-e-jaam-e-sharaab thaam le dast-e-subu aae jo chalne mein lachak khat-e-baghdaad ho mu-e-kamar-e-jaam-e-sharaab tur-e-sinaa kaa gumaan ho khum-e-mai par sab ko is tarah hosh uDaao asar-e-jaam-e-sharaab saaghar-e-mai mein nahin partav-e-khaal-e-saaqi hai kaf-e-dukhtar-e-raz mein sipar-e-jaam-e-sharaab khaak mai-khaane ki ban jaati qayaamat pis kar har qadam par jo lachakti kamar-e-jaam-e-sharaab aaj mai-noshon kaa majmaa hai kahaan ai saaqi kaun si bazm mein hai shor-o-shar-e-jaam-e-sharaab jitne mai-khvaar hain saaqi se gale milte hain sahar-e-id bani hai khabar-e-jaam-e-sharaab shisha-e-mai se uDaa kaag kabutar ki tarah naama pahunchaane chalaa naama-bar-e-jaam-e-sharaab mauj-e-sahbaa pe giraa sapna-e-minaa uD kar hai mire saamne tegh-o-sipar-e-jaam-e-sharaab mai pilaataa hai agar Dhaanp le siina saaqi tere joban ko lagegi nazar-e-jaam-e-sharaab aaftaab aa ke sikhaataa hai chalan shab-bhar kaa raat ko hotaa hai aksar guzar-e-jaam-e-sharaab dast-e-saaqi mein rahe dast-e-qadah-kash mein rahe gardan-e-shisha-e-sahbaa kamar-e-jaam-e-sharaab mast karte hain do-aalam ko yahi do khud-mast lazzat-e-naghma-e-mutrib asar-e-jaam-e-sharaab kyaa ghazab hai ki tiraa honTh na chuse 'maail' aur ho tere labon tak guzar-e-jaam-e-sharaab"

"jumbish mein zulf-e-pur-shikan ek is taraf ek us taraf gardish mein chashm-e-sehr-e-fan ek is taraf ek us taraf aariz pe zulf-e-pur-shikan ek is taraf ek us taraf hain aaj do suraj-gahan ek is taraf ek us taraf matlab ishaaron se kahaa main in ishaaron ke fidaa aankhein bhi hain garm-e-sukhan ek is taraf ek us taraf jis dam sikandar mar gayaa haal-e-tahi-dasti khulaa the haath bairun-e-kafan ek is taraf ek us taraf jaaegaa do ho kar ye dil aadhaa idhar aadhaa udhar khinchegi zulf-e-pur-shikan ek is taraf ek us taraf ghairon se khel khelo na tum kar deinge rusvaa hashr mein hain do farishte jaan-e-man ek is taraf ek us taraf aariz pe simTe khud-ba-khud zulfon ke ghungar vaale baal hai naafa-e-mushk-e-khutan ek is taraf ek us taraf shirin kaa khvaahaan hashr mein khusrav bhi hai farhaad bhi khincheinge donon pairahan ek is taraf ek us taraf ghungaT jo gaalon se uThaa taar-e-nazaara jal gayaa suraj the do jalva-figan ek is taraf ek us taraf qaatil idhar jarraah udhar main nim-bismil khaak par ik tir-e-kash ik tir-e-zan ek is taraf ek us taraf aankhon ke andar jaae ghair aankhon ke uupar hai naqaab khalvat mein hain do anjuman ek is taraf ek us taraf vo haathaa-paai ham ne ki bistar pe TuuTe aur gire baazu ke donon nau-ratan ek is taraf ek us taraf pesh-e-khudaa roz-e-jazaa main bhi huun chup qaatil bhi chup goyaa khaDe hain be-dahan ek is taraf ek us taraf rukhsaar par khat kaa nishaan gul par huaa sabza ayaan hain donon aariz do chaman ek is taraf ek us taraf kaafir bhi huun momin bhi huun jalnaa bhi hai gaDnaa bhi hai khincheinge shaikh-o-barhaman ek is taraf ek us taraf ghabraa na jaaein dil-jigar hai band turbat mein havaa pankhe hon do nazd-e-kafan ek is taraf ek us taraf yaarab uThun jab qabr se do but rahein ham-rah mire ghaarat-gar-e-hindu-o-dakan ek is taraf ek us taraf kahte hain anmol us ko sab kahte hain kuchh gol us ko sab kyaa chiiz hai ai jaan-e-man ek is taraf ek us taraf jannat ki hurein aaiin hain 'maail' dabaane mere paanv baiThi hain nazdik-e-kafan ek is taraf ek us taraf"

"nikli jo ruuh ho gae ajzaa-e-tan kharaab ik sham' bujh gai to hui anjuman kharaab kyuun Daaltaa hai khaak ki hogaa kafan kharaab main huun safed-posh na kar pairahan kharaab ji mein ye hai ki dil hi ko sajde kyaa karun dair-o-haram mein log hain ai jaan-e-man kharaab naazuk dilon kaa husn hai rang-e-shikastagi phaTne se kab gulon kaa huaa pairahan kharaab duniyaa ne munh pe Daalaa hai parda saraab kaa hote hain dauD dauD ke tishna-dahan kharaab iblis se ye kahtaa hai laa'nat kaa tauq roz aadam kharaab yaa sifat maa-o-man kharaab kyaa khushnumaa ho khizr baDhe gar libaas-e-umr qad se jo ho daraaz to ho pairahan kharaab meraa salaam-e-ishq 'alaihis-salaam ko khusrav idhar kharaab udhar kohkan kharaab yusuf ke husn ne ye zulekhaa ko di sadaa lo ungliyaan kaTin vo hue taa'na-zan kharaab gar bas chale to aap phirun apne gird mein kaa'be ko jaa ke kaun ho ai jaan-e-man kharaab zakhmi huaa hai naam ko dar-parda husn bhi yusuf kaa khun-e-gurg se hai pairahan kharaab vaa'da kiyaa hai ghair se aur vo bhi vasl kaa kulli karo huzur huaa hai dahan kharaab ai khaak-e-gor dekh na dhabbaa lage kahin rakh duun abhi utaar ke gar ho kafan kharaab kaisi bhi ho zamin 'ajab hal hai tab-e-tez 'maail' jo boein ham na ho tukhm-e-sukhan kharaab"

"mahshar mein chalte chalte karungaa adaa namaaz paDh lungaa pul-siraat pe 'maail' qazaa namaaz sar jaae umr bhar ki ho yaarab adaa namaaz aae miri qazaa to paDhun main qazaa namaaz maangi najaat hijr se to maut aa gai roze gale paDe jo chhuDaane gayaa namaaz dekho ki phans na jaaein farishte bhi jaal mein kyuun paDh rahe ho khol ke zulf-e-rasaa namaaz har ik sutun khaana-e-shar-e-sharif hai roza ho yaa zakaat ho yaa haj ho yaa namaaz ye kyuun khamida hai sifat-e-saahab-e-ruku kyaa paDh rahi hai dosh pe zulf-e-dotaa namaaz niyyat jo baandh li to chalaa main huzur mein rahbar miri namaaz miri rahnumaa namaaz saaqi qayaam se ye jo aayaa rukua mein shisha khudaa ke khauf se paDhtaa hai kyaa namaaz uTh uTh ke baiTh baiTh ke kartaa hai kyuun ghurur zaahid kahin baDhaae na teri riyaa namaaz arkaan yaad hain mujhe ai daavar-e-jazaa gar hukm ho to saamne paDh luun qazaa namaaz shaitaan ban gayaa hai farishta ghurur se kyaa faaeda huaa jo paDhi jaa-ba-jaa namaaz le jaate hain mujhe su-e-dozakh kashaan kashaan roze mire idhar hain udhar hai qazaa namaaz haqq-ul-yaqin kaa naam uruj-e-maqaam hai paDhte hain auliyaa sar-e-dosh-e-havaa namaaz masjid mein paanch vaqt duaa vo bhi vasl ki 'maail' buton ke vaaste paDhte ho kyaa namaaz"

"kyaa roz-e-hashr duun tujhe ai daad-gar javaab aamaal-naame kaa to hai peshaani par javaab ruk ruk ke hans ke yuun hi to de fitna-gar javaab detaa hai aur lutf mujhe teraa har javaab kis se misaal duun tiri zulf-e-daraaz ko umr-e-tavil-e-khizr hai ik mukhtasar javaab mushkil ke vaqt dil hi se kuchh mashvara karein kyuun dein kisi ko ghair se ham puchh kar javaab karte hain sajda naqsh-e-qadam ko tamaam log hai khaana-e-khudaa kaa tiri rahguzar javaab munkir-nakir puchhte hain DaanT DaanT kar hon muntashir havaas to kyaa de bashar javaab khuld-o-saqar ke biich mein hai koi ishq-e-yaar hai pul-siraat kaa ye miri rahguzar javaab kyuun sar jhukaa rahaa hai zaraa aankh to milaa degi mire savaal kaa teri nazar javaab ghusse mein yuun na aao ki ghussa haraam hai tum baat hi se baat kaa do soch kar javaab zarron ki tarah khaak mein hain aashiqon ke dil gar tu kare savaal to de rahguzar javaab main ne kiyaa salaam to chilman mein chhup gae dar-parda degi ab nigah-e-parda-dar javaab hangaama hashr kaa sifat-e-gard rah gayaa tere khiraam kaa na huaa fitna-gar javaab kyaa apne bhole-pan se kahein dam mein aae ho har baat kaa jo dete ho ab soch kar javaab kyaa hogaa khaak ho ke sar-e-charkh jaaegaa ye zer-e-paa savaal vo baalaa-e-sar javaab likkhaa hai mujh ko ho gayaa teraa lahu safed main bhi likhungaa khuun se sar phoD kar javaab behosh kar ke puchhte ho dil kaa muddaaa detaa bhi hai huzur kahin be-khabar javaab ghusse se kuchh kahun to vo kis tarah chup rahe ik baat kaa jo shaam se de taa-sahar javaab chitvan se taaD jaate hain 'maail' kaa muddaaa dil mein idhar savaal hai lab par udhar javaab"

"zamzama naala-e-bulbul Thahre main jo fariyaad karun ghul Thahre naghma-e-kun ke karishme dekho kahin qum qum kahin qulqul Thahre jaal mein kaatib-e-aamaal phansein dosh par aa ke jo kaakul Thahre raat din rahti hai gardish un ko chaand suraj qadah-e-mul Thahre meraa kahnaa tiraa sunnaa maalum jumbish-e-lab hi agar gul Thahre jaan kar bhi vo na jaanein mujh ko aarifaana hi tajaahul Thahre aashiqi mein ye tanazzul kaisaa aap ham kyuun gul-o-bulbul Thahre tujh pe khul jaae jo raaz-e-hama-ust falsafi duur o tasalsul Thahre aankh se aankh mein paighaam aae gar nigaahon kaa tavassul Thahre khul gai be-hamagi baa-hamagi kul main jab mahv hue kul Thahre dil se dil baat kare aankh se aankh aashiqi kaa jo tavassul Thahre kyuun na firdaus mein jaae 'maail' jab mohammad kaa tavassul Thahre"

"ru-e-taabaan maang mu-e-sar dhuaan batti charaagh kyaa nahin insaan ki gardan par dhuaan batti charaagh kuchh na puchho zaahidon ke baatin-o-zaahir kaa haal hai andheraa ghar mein aur baahar dhuaan batti charaagh dud-e-afghaan-o-rag-e-jaan-o-suvaidaa dil mein hai band hai qindil ke andar dhuaan batti charaagh tuur par jaa kar charaagh-e-tur kyuun dekhe koi kyaa makaanon mein nahin patthar dhuaan batti charaagh ho muaafiq kyunkar ai parvaane saaya-gustari hai mukhaalif zer-e-baal-o-par dhuaan batti charaagh kaanptaa hai haath taasir-e-dil-e-betaab se main karun raushan to ho muztar dhuaan batti charaagh surat-e-bakhshish dikhaavein kaaghaz-o-satr-o-huruf ho amal-naama sar-e-mahshar dhuaan batti charaagh khizr hai bahri musaafir kaa manaar-e-raushni hai jahaazon ke liye rahbar dhuaan batti charaagh kyaa zarurat raushni ki be-khudi ki bazm mein zulf-e-saaqi mauj-e-mai saaghar dhuaan batti charaagh shoala-ruyon ke muqaabil rang jamtaa hi nahin uD na jaae bazm se ban kar dhuaan batti charaagh kis saliqe se hai raushan mahfil-e-arz-o-samaa aasmaan par chaand hai ghar ghar dhuaan batti charaagh subh tak karte rahe raushan dilon se hamsari shaam se raushan nafas ho kar dhuaan batti charaagh 'ishq ki garmi ne phunkaa parde parde mein mujhe meri chaadar mein miraa bistar dhuaan batti charaagh zulf-o-rukhsaar-o-nazar hain dushman-e-imaan-o-din luTne nikle hain vo le kar dhuaan batti charaagh main vo taair huun jo huun kam-kharch aur baalaa-nashin ek jugnu yaan hai aur ghar ghar dhuaan batti charaagh shab ko 'maail' vaqt-e-aaraaish musaahib the yahi phuul surma aaina zevar dhuaan batti charaagh"

"chori se do ghaDi jo nazaare hue to kyaa chilman to biich mein hai ishaare hue to kyaa bosa-dahi kaa lutf milaa husn baDh gayaa rukhsaar laal laal tumhaare hue to kyaa be-parda munh dikhaa ke mire hosh uDaao tum parde ki aaD se jo nazaare hue to kyaa mujh ko kuDhaa kuDhaa ke vo maareinge jaan se dilbar hue to kyaa mire pyaare hue to kyaa ai jaan muqaabla mire haathon se kab huaa joban tire ubhar ke karaare hue to kyaa ulfat kaa lutf kyaa jo baghal hi na garm ho vo dil mein rahne vaale hamaare hue to kyaa taasir de du'aa mein khudaa hai yahi du'aa unche jo donon haath hamaare hue to kyaa bosa na de vo mujh ko to main is ko dil na duun is gore haath se jo ishaare hue to kyaa tum soo phail ke phulon ki sej par furqat mein ham jo gor kinaare hue to kyaa siina milaa ke siina se dil mein jagah karo phirte ho jaubanon ko ubhaare hue to kyaa kab khelne pakaD ke havaa mein se laae vo jugnu jo aah dil ke sharaare hue to kyaa ai jaan hai teri zulf-e-pareshaan kaa husn aur huron ke baal hain jo sanvaare hue to kyaa aankhein khuli bhi huun to vahi saamne rahe aankhon ko band kar ke nazaare hue to kyaa laakhon maze milein mire lab se agar milein vo gore gaal aankh ke taare hue to kyaa yak bosa aur lungaa araq munh se puchh kar vo aab aab sharm ke maare hue to kyaa 'maail' na ho visaal to kyaa 'ishq kaa mazaa maa'shuq duur se vo hamaare hue to kyaa"

"kyuun shauq baDh gayaa ramazaan mein singaar kaa roza na TuuT jaae kisi roza-daar kaa un kaa vo shokhiyon se phaDaknaa palang par vo chhaatiyon pe loTnaa phulon ke haar kaa huur aae khuld se to biThaaun kahaan use aaraasta ho ek to konaa mazaar kaa shishon ne tarz uDaai ruku o qayaam ki kyaa in mein hai lahu kisi parhez-gaar kaa kyuun ghash hue kalim tajalli-e-tur par vo ik charaagh thaa mire dil ke mazaar kaa baad-e-fanaa bhi saaf nahin dil raqib se gumbad khaDaa huaa hai lahad par ghubaar kaa kasrat kaa rang shaahid-e-vahdat kaa hai banaav vo ek hi se naam hai hazda hazaar kaa naaqus bin ke puchhne jaaun agar mizaaj but bhi kaheinge shukr hai parvardigaar kaa dulhaa ki ye baraat hai rasmein adaa karo dar par janaaza aayaa hai ik jaan-nisaar kaa kyaa kyaa taDap taDap ke saraafil gir paDe dam aa gayaa jo suur mein mujh be-qaraar kaa surma ke saath phail ke kyaa vo bhi miT gayaa kyuun naam tak nahin tiri aankhon mein pyaar kaa kyaa raat se kisi ki nazar lag gai ise achchhaa nahin mizaaj dil-e-be-qaraar kaa aankhein miri faqir huiin shauq-e-did mein tasma kamar mein hai nigah-e-intizaar kaa luTun maze jo baazi-e-shatranj jiit luun is khel mein to vaa'da hai bos-e-kanaar kaa allaah miraa ghafur mohammad mire shafia 'maail' ko khauf kuchh nahin roz-e-shumaar kaa"

"koi hasin hai mukhtaar-e-kaar-khaana-e-ishq ki laa-makaan hi ki chaukhaT hai aastaana-e-ishq nigaahein DhunDh rahi hain dil-e-yagaana-e-ishq ishaare puchh rahe hain kahaan hai khaana-e-ishq phireinge hashr mein gard-e-dil-e-yagaana-e-ishq kareinge pesh-e-khudaa ham tavaaf-e-khaana-e-ishq nai sadaa ho nae honTh hon nayaa lahja nai zabaan se kahun gar kahun fasaana-e-ishq jo maulvi hain vo likkheinge kufr ke fatve sunaaun surat-e-mansur agar taraana-e-ishq agar lage to lage choT mere naale ki agar paDe to paDe dil pe taaziyaana-e-ishq jo Daal dein use patthar pe bhi phale-phule darakht-e-tur bane sabz ho ke daana-e-ishq tumhin kaho jo luTaa dein to kaun khaali ho khazaana husn kaa afzun hai yaa khazaana-e-ishq vo raat aae ki sar teraa le ke baazu par tujhe sulaaun bayaan kar ke main fasaana-e-ishq vo dar tak aate nahin dar se ham nahin uThte udhar bahaana-e-husn aur idhar bahaana-e-ishq sikhaai kis ne ye raftaar mere naale ko kamar ki tarah lachaktaa hai taaziyaana-e-ishq kisi ko pyaar karegaa shabaab mein tu bhi tire bhi ghar mein jalegaa charaagh-e-khaana-e-ishq jo khush-navis mile koi deinge dil apnaa ham is kitaab mein likhvaaeinge fasaana-e-ishq gae hain vo miri mahfil mein bhuul kar rumaal ye jaa-namaaz bichhaa kar paDhun dogaana-e-ishq kisi ke husn ne kaafir banaa diyaa 'maail' lagaa ke qashqa-e-durd-e-sharaab-khaana-e-ishq"

"ho gae muztar dekhte hi vo hilti zulfein phirti nazar ham dete hain dil ik aafat-e-jaan ko thaame hue haathon se jigar ham ghair ko gar vo pyaar kareinge apne lahu mein honge tar ham Daal hi deinge un ke qadam par kaaT kar apne haath se sar ham sulh hui to naale khinche yuun karte hain sab ko khabar ham piTte hain siine kaa DhinDhoraa dete hain dil baar-e-digar ham aur mileinge chhoD na deinge sun ke sadaa-e-murgh-e-sahar ham halqa donon haath kaa apne Daal rakheinge gird-e-kamar ham dil ke andar tuur ke uupar chashm-e-sanam mein ain haram mein teri hi surat teri hi murat pujne jaaein tujh ko kidhar ham raaz chhupte to aaghaaz achchhaa bhed khule to anjaam achchhaa misl-e-sikandar bhes badal kar jaate hain ban kar naama-bar ham andaaza go kar hi chuke hain aa jaati hai muTThi mein ye aaj magar be-parda kareinge dekheinge patli si kamar ham laate hi kuchh rang-e-javaani aankh se yuun kiin aankh ne baatein aao dikhaaein sab ko ghaatein shoabda-gar tum jaadugar ham kahti hain zulfein mushkin kas lein koi jo Daale haath kamar mein phail ke soo Dar kyaa tum ko gasht kareinge gird-e-kamar ham lutf baDaa ho aur mazaa ho is ke 'evaz gar aap ko paaein baiTh ke apne ghar ke andar DhunDh rahe hain yaar kaa ghar ham tum ko nazaakat aur khudaa de ham ko lazzat aur khudaa de paaeinche tum chuTki se uThaa lo thaame hue chalte hain kamar ham uThtaa joban jhukti gardan dabti baatein rukti ghaatein haae na kyuun sau jaan se fidaa hon in chaaron par uTh phir ham saaya ban kar saath chaleinge saath phireinge saath raheinge apne ghar mein ghair ke dil mein jaao jidhar tum aaein udhar ham jald tum uTTho dauD ke aao ham ko thaamo ham ko sambhaalo girte hain misl-e-ashk zamin par uThte hain shakl-e-dard-e-jigar ham sab se chhuDaa kar laae uDaa kar kyaa na rakheinge dil mein chhupaa kar rahne basne chalne phirne tum ko khudaa kaa deinge ghar ham munh jo khulegaa ranj baDhegaa ham se na bolo ham ko na chheDo kaahida-tan aazurda-jaan aashufta-dil khasta-jigar ham ye to chhapar-khaT chhoTaa saa hai pahlu mein tum sooge kyunkar aao liTaa lein siine par ham tum ko sulaa lein chhaati par ham ranj gar aayaa ho to bhulaa de pyaar baDhaa de ham se milaa de un ki nigah se to gir to chuke hain jaaein na yaarab dil se utar ham dekh ke un kaa joban ubhraa main ne kahaa ye maal hai achchhaa bole vo kyaa tum luuT hi loge god mein yuun aa jaaein agar ham Thahri hai baaham lutf ki baazi pahle jo paae jiit usi ki vasl ki shab hai DhunDh rahe hain dil vo hamaaraa un ki kamar ham roz nae dil laaein kahaan se aise tohfe paaein kahaan se chaaT paDi hai tum ko dilon ki luTne jaaein kis kaa ghar ham ghair ke bar mein un ko dekhaa khaak mein jaae aisaa nazaara haath mein kam-bakht aa nahin saktaa toDte varna taar-e-nazar ham nashv-o-numaa paai hai deccan mein qadr hamaari kyunkar hogi ghar ki murghi daal baraabar kis ko dikhaaein apnaa hunar ham kyuun na kare divaana kisi ko sharm ki 'aadat husn ki shokhi ho gae 'maail' dekh ke maail uThtaa joban jhukti nazar ham"