Ghazal

"koi an-dekhi fazaa tasvir karnaa chaahiye khvaab ki buniyaad par taa'mir karnaa chaahiye main bhaTaktaa phir rahaa huun vaahimon ke darmiyaan gard lipTi ruuh ki tathir karnaa chaahiye jin dinon divaangi Thahri hui ho zaat mein ek duniyaa un dinon taskhir karnaa chaahiye jis sadaa mein sau tarah ke rang jhilmil karte hon vo sadaa har haal mein tasvir karnaa chaahiye jald-baazi de gai hai rat-jagon ke silsile faisle mein thoDi si taakhir karnaa chaahiye ab bagule mujh mein hain aur main bagulon mein 'khayaal' dasht mein divaangi zanjir karnaa chaahiye"

"dast-baston ko ishaara bhi to ho saktaa hai ab vahi shakhs hamaaraa bhi to ho saktaa hai main ye aise hi nahin chhaan rahaa huun ab tak khaak mein koi sitaara bhi to ho saktaa hai ain mumkin hai ki binaai mujhe dhoka de ye jo shabnam hai sharaara bhi to ho saktaa hai is mohabbat mein har ik shai bhi to luT sakti hai is mohabbat mein khasaara bhi to ho saktaa hai gar hai saanson kaa tasalsul miri qismat mein 'khayaal' phir ye girdaab kinaaraa bhi to ho saktaa hai"

"jaisi honi ho vo raftaar nahin bhi hoti raah is samt ki hamvaar nahin bhi hoti main tahi-dast laDaai ke hunar sikhtaa huun kabhi is haath mein talvaar nahin bhi hoti phir bhi ham log the rasmon mein aqidon mein judaa gar yahaan biich mein divaar nahin bhi hoti vo miri zaat se inkaar kiye rakhtaa hai gar kabhi surat-e-inkaar nahin bhi hoti jis ko bekaar samajh kar kisi kone mein rakhein aisaa hotaa hai ki bekaar nahin bhi hoti dil kisi bazm mein jaate hi machaltaa hai 'khayaal' so tabiat kahin be-zaar nahin bhi hoti"

"dasht o junun kaa silsila mere lahu mein aa gayaa ye kis jagah pe main tumhaari justuju mein aa gayaa vo sarv-qaamat ho gayaa hai dekhte hi dekhte jaane kahaan se zor saa us ki numu mein aa gayaa bas chand lamhe pesh-tar vo paanv dho ke palTaa hai aur nuur kaa sailaab saa is aabju mein aa gayaa chaaron taraf hi titliyon ke raqs hone lag gae tu aa gayaa to baagh saaraa rang-o-bu mein aa gayaa main jhumte hi jhumte 'ahmad' tamaashaa ban gayaa jab aks us ke raqs kaa mere subu mein aa gayaa"

"sukut toDne kaa ehtimaam karnaa chaahiye kabhi-kabhaar khud se bhi kalaam karnaa chaahiye adab mein jhuknaa chaahiye salaam karnaa chaahiye khirad tujhe junun ko imaam karnaa chaahiye ulajh gae hain saare taar ab mire khudaa tujhe tavil daastaan kaa ikhtitaam karnaa chaahiye tamaam log nafraton ke zahr mein bujhe hue mohabbaton ke silsilon ko aam karnaa chaahiye mire lahu tu chashm aur ashk se gurez kar tujhe ragon ke darmiyaan khiraam karnaa chaahiye"

"un ko mein karbalaa ke mahine mein laaungaa kuufa ke saare log madine mein laaungaa ye zar bhi ek roz dafine mein laaungaa saare jahaan ke dard ko siine mein laaungaa miTTi kuchh ajnabi se jaziron ki laazmi lauTaa tu apne saath safine mein laaungaa pahle karungaa chhat pe bahut der guftugu phir is ke baad chaand ko ziine mein laaungaa ji bhar ke mein ne khaak uDaa li nagar nagar ab zindagi ko ek qarine mein laaungaa"

"falak ke rang zamin par utaartaa huaa main tamaam khalq ko hairat se maartaa huaa main do chaar saans mein jiitaa huun ek arse tak zaraa se vaqt mein sadiyaan guzaartaa huaa main jo mere saamne hai aur dil-o-dimaagh mein bhi chahaar-samt usi ko pukaartaa huaa main mire nuqush pe kaari-gari ruki hui hai shikasta chaak se khud ko utaartaa huaa main tumhaari jiit mein pinhaan hai meri jiit kahin tumhaare saamne har baar haartaa huaa main"

"ghubaar abr ban gayaa kamaal kar diyaa gayaa hari bhari ruton ko meri shaal kar diyaa gayaa qadam qadam pe kaasa le ke zindagi thi raah mein so jo bhi apne paas thaa nikaal kar diyaa gayaa main zakhm zakhm ho gayaa lahu vafaa ko ro gayaa laDaai chhiD gai to mujh ko Dhaal kar diyaa gayaa gulaab-rut ki deviyaan nagar gulaab kar gaiin main surkh-ru huaa use bhi laal kar diyaa gayaa vo zahr hai fazaaon mein ki aadmi ki baat kyaa havaa kaa saans lenaa bhi muhaal kar diyaa gayaa"

"kal raat ik ajiib paheli hui havaa jalte hue diyon ki saheli hui havaa shiddat se haanp haanp ke murda si ho chuki vahshat-zada charaagh se kheli hui havaa palTi to daastaan bhi palTegi ek dam vaadi ki band samt dhakeli hui huaa sab paat jhaD chuke hain diye bhi shikasta hain raqs o junun ki rut mein akeli hui huaa khiDki se aate hi mare maathe ko chhuti hai us mehrbaan ki si hatheli hui huaa"

"ghubaar-e-abr ban gayaa kamaal kar diyaa gayaa hari-bhari ruton ko meri shaal kar diyaa gayaa qadam qadam pe kaasa le ke zindagi thi raah mein so jo bhi apne paas thaa nikaal kar diyaa gayaa main zakhm zakhm ho gayaa lahu vafaa ko ro gayaa laDaai chhiD gai to mujh ko Dhaal kar diyaa gayaa gulaab-rut ki deviyaan nagar gulaab kar gaiin main surkh-ru huaa use bhi laal kar diyaa gayaa tu aa ke mujh ko dekh to ghubaar ke hisaar mein tire firaaq mein ajiib haal kar diyaa gayaa vo zahr hai fazaaon mein ki aadmi ki baat kyaa havaa kaa saans lenaa bhi muhaal kar diyaa gayaa"

"har ek rang dhanak ki misaal aisaa thaa shab-e-visaal tumhaaraa jamaal aisaa thaa havaa ke haath pe chhaale hain aaj tak maujud mire charaagh ki lau mein kamaal aisaa thaa main chal paDaa huun andhere ki ungliyaan thaame utarti shaam ke rukh kaa jamaal aisaa thaa zaraa si der bhi Thahraa nahin huun maujon mein samay ke bahr mein ab ke uchhaal aisaa thaa vo sar uThaae yahaan se palaT gayaa 'ahmad' main sar jhukaae khaDaa huun savaal aisaa thaa"

"basti se chand roz kinaara karungaa main vahshat ko jaa ke dasht mein maaraa karungaa main vaise to ye zamin mire kaam ki nahin lekin ab is ke saath guzaaraa karungaa main shaayad ki is se murda samundar mein jaan aae sahraa mein kashtiyon ko utaaraa karungaa main manzar kaa rang rang nigaahon mein aaegaa ik aise zaaviye se nazaara karungaa main ai mehrbaan ajal mujhe kuchh vaqt chaahiye jab ji bharaa to tum ko ishaara karungaa main"

"shahr-e-sadmaat se aage nahin jaane vaalaa main tiri zaat se aage nahin jaane vaalaa tu bhi auqaat mein rah mujh se jhagaDne vaale main bhi auqaat se aage nahin jaane vaalaa aise lagtaa hai miri jaan taalluq apnaa is mulaaqaat se aage nahin jaane vaalaa aaj ki raat hai bas nuur ki kirnon kaa jalaal diip is raat se aage nahin jaane vaalaa mere kashkol mein Daal aur zaraa ijz ki main itni khairaat se aage nahin jaane vaalaa"

"jis samay teraa asar thaa mujh mein baat karne kaa hunar thaa mujh mein subh hote hi sabhi ne dekhaa koi taa hadd-e-nazar thaa mujh mein maan bataati hai ki bachpan ke samay kisi aaseb kaa Dar thaa mujh mein jo bhi aayaa kabhi vaapas na gayaa aisi chaahat kaa bhanvar thaa mujh mein main thaa sadiyon ke safar mein 'ahmad' aur sadiyon kaa safar thaa mujh mein"

"ye taalluq tiri pahchaan banaa saktaa thaa tu mire saath bahut naam kamaa saktaa thaa ye bhi ejaaz mujhe ishq ne bakhshaa thaa kabhi us ki aavaaz se main diip jalaa saktaa thaa main ne baazaar mein ik baar ziyaa baanTi thi meraa kirdaar mire haath kaTaa saktaa thaa kuchh masaail mujhe ghar rok rahe hain varna main bhi majnun ki tarah khaak uDaa saktaa thaa ab to tinkaa mujhe shahtir se bhaari hai 'khayaal' main kisi vaqt bahut bojh uThaa saktaa thaa"

"koi hairat hai na is baat kaa ronaa hai hamein khaak se uTThe hain so khaak hi honaa hai hamein phir taalluq ke bikharne ki shikaayat kaisi jab use kaanch ke dhaagon mein pironaa hai hamein ungliyon ki sabhi poron se lahu ristaa hai apne daaman ke ye kis daagh ko dhonaa hai hamein phir utar aae hain palkon pe sisakte aansu phir kisi shaam ke aanchal ko bhigonaa hai hamein ye jo aflaak ki vusat mein liye phirti hai is anaa ne hi kisi roz Dubonaa hai hamein"

"ai taassub zada duniyaa tire kirdaar pe khaak bughz ki gard mein lapTe hue meaar pe khaak ek arse se mari zaat mein aabaad hai dasht ek arse se paDi hai dar-o-divaar pe khaak vo ghazaalon se abhi siikh ke ram lauTaa hai baal hain dhuul mein gum aur lab-o-rukhsaar pe khaak mujhe palkon se safaai ki saaadat ho nasib Daal kar jaae huaa roz dar-e-yaar pe khaak ek khutba jo diyaa hazrat-e-zainab ne 'khayaal' aaj tak Daal rahaa hai kisi darbaar pe khaak"

"qayaamat se qayaamat se guzaare jaa rahe the ye kin haathon hazaaron log maare jaa rahe the sunahri jal-pari dekhi to phir paani mein kuude vagarna ham to dariyaa ke kinaare jaa rahe the samundar ek qatre mein sameTaa jaa rahaa thaa shutur suui ke naake se guzaare jaa rahe the chaman-zaaron mein khema-zan the sahraaon ke baasi hare manzar nigaahon mein utaare jaa rahe the sabhi taalaab phulon aur kirnon se bharaa thaa badan khush-rang paani se nikhaare jaa rahe the"

"junun ko rakht kiyaa khaak ko libaada kiyaa main dasht dasht bhaTakne kaa jab iraada kiyaa main naasehaan ki suntaa huun aur Taaltaa huun so qurb-e-husn chhuTaa aur na tark-e-baada kiyaa mahakte phuul sitaare damaktaa chaand dhanak tire jamaal se kitnon ne istifaada kyaa hazaar rang mein jalva-numaa thaa husn-o-jamaal dil aur shokh huaa us ko jitnaa saada kiyaa vo de rahaa thaa talab se sivaa sabhi ko 'khayaal' so main ne daaman-e-dil aur kuchh kushaada kiyaa"

"dasht mein vaadi-e-shaadaab ko chhu kar aayaa main khuli-aankh hasin khvaab ko chhu kar aayaa us ko chhu kar mujhe mahsus huaa hai aise jaise main resham-o-kim-khvaab ko chhu kar aayaa mujh ko maalum hai poron ke damakne kaa javaaz raat main khvaab mein mahtaab ko chhu kar aayaa jism ke saath miri ruuh bhi nam hone lagi jab se us dida-e-pur-aab ko chhu kar aayaa ruuh ki kaai isi taur se chhaTnaa thi so main subh-dam mimbar-o-mehraab ko chhu kar aayaa murtaish kirnon kaa raqs ek ghaDi bhi na thame chaand kis tarz ke taalaab ko chhu kar aayaa"

"use ik ajnabi khiDki se jhaankaa zamaane ko nai khiDki se jhaankaa vo puuraa chaand thaa lekin hamesha gali mein adh-khuli khiDki se jhaankaa mein pahli martaba nashshe mein aayaa koi jab dusri khiDki se jhaankaa amar hone ki khvaahish mar gai thi jab is ne daaimi khiDki se jhaankaa mein sabze par chalaa thaa nange paanv sahar dam shabnami khiDki se jhaankaa mujhe bhaate hain lamhe ikhtitaami mein pahle aakhiri khiDki se jhaankaa"

"zindagi khauf se tashkil nahin karni mujhe raat se zaat ki takmil nahin karni mujhe kisi darvesh ke hujre se abhi aayaa huun so tire hukm ki taamil nahin karni mujhe chhoD di dasht-navardi bhi ziyaan-kaari bhi zindagi ab tiri tazlil nahin karni mujhe dil ke baazaar mein zanjir-zani honi nahin aankh bhi aankh rahe jhiil nahin karni mujhe main ki ilhaad ke girdaab mein aayaa huaa huun ab kisi ilm ki tahsil nahin karni mujhe laDte rahnaa hai tasalsul se mujhe subh talak aur talvaar bhi tabdil nahin karni mujhe"

"main vahshat-o-junun mein tamaashaa nahin banaa sahraa mire vajud kaa hissa nahin banaa is baar kuza-gar ki tavajjoh thi aur samt varna hamaari khaak se kyaa kyaa nahin banaa soi hui anaa mire aaDe rahi sadaa koshish ke baavajud bhi kaasa nahin banaa ye bhi tiri shikast nahin hai to aur kyaa jaisaa tu chaahtaa thaa main vaisaa nahin banaa varna ham aise log kahaan Thahrte yahaan ham se falak ki samt kaa ziina nahin banaa jitne kamaal-rang the saare liye gae phir bhi tire jamaal kaa naqsha nahin banaa rokaa gayaa hai vaqt se pahle hi meraa chaak mujh ko ye lag rahaa hai main puuraa nahin banaa"

"dariyaa mein dasht dasht mein dariyaa saraab hai is puuri kaaenaat mein kitnaa saraab hai rozaana ik faqir lagaataa hai ye sadaa duniyaa saraab hai are duniyaa saraab hai muusaa ne ek khvaab-e-haqiqat banaa diyaa vaise to gahre paani mein rasta saraab hai puuri tarah se haath mein aayaa nahin kabhi vo husn-e-be-misaal bhi aadhaa saraab hai khultaa nahin hai ret hai paani ki aur kuchh meri nazar ke saamne pahlaa saraab hai suraj ki tez dhuup mein dhoka har ek shai kaali ghaTaa si raat mein saaya saraab hai"