Ghazal

"jab dhuup mein fasl pak rahi thi har aankh chamak-damak rahi thi shishe mein ghubaar saaaton kaa patthar mein sadi jhalak rahi thi jab aag mein ham panah-guzin the ashjaar ko barf Dhak rahi thi sarhad ki lakir dekh aae khanjar ki tarah chamak rahi thi ehsaas ki lau ghaTaa li main ne meri hi taraf lapak rahi thi"

"baDhaa jab us ki tavajjoh kaa silsila kuchh aur khushi se phail gayaa gham kaa daaera kuchh aur natija dekh ke maanaa mire masihaa ne kuchh aur dard thaa meraa hui davaa kuchh aur main apne aap ko kis aaine mein pahchaanun ki ek 'aks miraa kuchh hai dusraa kuchh aur agar kahin koi divaar saamne aai buland ho gayaa paani kaa hausla kuchh aur kuchh aise dekhtaa hai vo mujhe ki lagtaa hai dikhaa rahaa hai mujhe meraa aaina kuchh aur natija dekhne sunne ke baa'd ye niklaa bayaan-e-vaaqia kuchh amr-e-vaaqia kuchh aur guzar muhaal na hotaa hamaaraa basti mein jo uThtin chhoD ke divaarein raasta kuchh aur"

"nahin hai bahr-o-bar mein aisaa mere yaar koi ki jis khitte kaa miltaa ho na daavedaar koi yunhi buniyaad kaa darja nahin miltaa kisi ko khaDi ki jaaegi mujh par abhi divaar koi pataa chalne nahin detaa kabhi fariyaadiyon ko lagaa kar baiTh jaataa hai kahin darbaar koi nigaahein us ke chehre se nahin haTtin jo dekhun ki hai us ke gale mein besh-qimat haar koi bachaataa phirtaa huun dariyaa mein apni kashti-e-jaan kabhi is paar hai koi bhi us paar koi usi kaa qahr barpaa hai usi kaa faiz jaari har ik majbur kaa hai maalik-o-mukhtaar koi kahlvaayaa hai us ne phaand kar divaar aa jaanaa agar darvaaze par baiThaa ho pahre-daar koi"

"Thahar Thahar ke miraa intizaar kartaa chal ye sakht-raah bhi ab ikhtiyaar kartaa chal safar ki raat hai har gaam ehtiyaat barat palaT palaT ke andheron pe vaar kartaa chal liye jaa kaam tu apni firaakh-dasti se qadam qadam pe mujhe zer-e-baar kartaa chal idhar udhar jo khaDe ho gae hain tere liye unhein bhi apne safar mein shumaar kartaa chal kisi Thikaane pe tujh ko agar pahunchnaa hai to naqsh-e-paa kaa mire e'tibaar kartaa chal na khinch dasht o jabal bahr o bar se qadmon ko ye sab rukaavaTein hain in ko paar kartaa chal"

"kahin kahin se pur-asraar ho liyaa jaae ki apne haq mein bhi hamvaar ho liyaa jaae vo jis ne zakhm lagaae rakhegaa marham bhi usi kaa dil se taraf-daar ho liyaa jaae yahi hai niind kaa manshaa ki khvaab-e-ghaflat se sahih vaqt pe bedaar ho liyaa jaae girah-kushaai-e-mauj-e-nafas bahaana hai ki is bahaane se us paar ho liyaa jaae kisi ki raah mein aane ki ye bhi surat hai ki saaya ke liye divaar ho liyaa jaae"

"main ye dekh ke bhi rukaa nahin ki ghubaar thaa mujhe raaste kaa pata nahin ki ghubaar thaa vo hujum saa jo umaD paDaa thaa mire liye mujhe dekhne ko milaa nahin ki ghubaar thaa miri rif’atein mujhe yak-ba-yak na samajh sakin kahin munkashif main huaa nahin ki ghubaar thaa mire saae ko na darakht the na ‘imaaratein mujhe aasmaan kaa pata nahin ki ghubaar thaa kai baar mere qarib se vo guzar gayaa mujhe phir bhi koi gila nahin ki ghubaar thaa kabhi paanv rakkhaa to phunk kar ki na uTh sake kabhi tole par to uDaa nahin ki ghubaar thaa mujhe Thokaron ne giraa diyaa to pata chalaa koi saamne se haTaa nahin ki ghubaar thaa"

"kahin qiyaam na thaa qaafila safar mein rahaa ghubaar silsila-dar-silsila nazar mein rahaa uDaai khaak-e-talab garmi-e-nafas ne miri rahaa na main to bagula saa rah-guzar mein rahaa jab us ke dar se main palTaa to koi raah na thi 'ajab tilism-e-mulaaqaat ke asar mein rahaa miri shikast khalaaon mein aashkaar hui vajud-e-sang se TuuTaa to main sharar mein rahaa huaa vo sho'la-e-hasti kaa raqs dariyaa mein ki us kaa naqsh-e-gumaan muddaton bhanvar mein rahaa"

"mujhe ghubaar uDaataa huaa savaar lagaa miraa qayaas havaaon ko naagavaar lagaa uchhaalne mein tujhe kitne haath shaamil the kinaare baiTh ke lahron kaa kuchh shumaar lagaa vo buDhaa peD jo thaa barg-o-baar se mahrum ham us se lag ke jo baiThe to saaya-daar lagaa ubuur dariyaa ko kartaa rahaa magar ik baar hue jo shal mire baazu to be-kanaar lagaa nigaah arz-o-samaa mein jo main ne dauDaai khinchaa huaa mujhe chaaron taraf hisaar lagaa"

"taabiron se band qabaa-e-khvaab khule mujh par mere mustaqbil ke baab khule jis ke haathon baadbaan kaa zor bandhaa usi huaa ke naakhun se girdaab khule us ne jab darvaaza mujh par band kiyaa mujh par us ki mahfil ke aadaab khule rahi hamesha gahraai par miri nazar bhed samundar ke sab zer-e-aab khule dil ke sivaa vo aur kahin rahtaa hai agar koi to darvaaza dar-e-mehraab khule"

"ubal paDaa yak-ba-yak samundar to main ne dekhaa khulaa jo raaz-e-sukut lab par to main ne dekhaa utar gayaa rang-e-ru-e-manzar to main ne dekhaa haTi nigaah-e-bahaar yaksar to main ne dekhaa na jaane kab se vo andar andar sulag rahaa thaa milaa jo divaar mein mujhe dar to main ne dekhaa tamaam gard-o-ghubaar dil se nikal chukaa thaa baras chukaa abr-e-ashk khul kar to main ne dekhaa nishaan qadmon ke raaste mein chamak rahe the guzar gayaa vo nazar bachaa kar to main ne dekhaa milaa ke miTTi mein rakh di us ne ibaadat us ki jo mere aage na kham kiyaa sar to main ne dekhaa"

"hisaar-e-jism miraa toD-phoD Daalegaa zarur koi mujhe qaid se chhuDaa legaa banaa ke jis ne mujhe shaahkaar pesh kiyaa hazaar khaamiyaan mujh mein vahi nikaalegaa main apni jaan hatheli pe rakh ke chaltaa huun koi bahut se bahut mujh se aur kyaa legaa ruke hue hain kai kaarvaan lab-e-dariyaa ki jaise aage koi raasta nikaalegaa ik ajnabi ke lahu par thaa sab kaa haq 'raahi' sunaa hai shahr kaa har shakhs khun-bahaa legaa"

"talvaar khinchte hue paayaa gayaa mujhe qaatil banaa ke hosh mein laayaa gayaa mujhe meraa hi khuun thaa jo pilaayaa gayaa mujhe jab sair ho gayaa to bataayaa gayaa mujhe kyaa shahr thaa ki rukte hi ik bhiiD lag gai fauran hi raaste se haTaayaa gayaa mujhe ik dusre ko dekh na sakte the raaste donon ke darmiyaan basaayaa gayaa mujhe Duube hue makaan ki chhat par khaDaa thaa main manzar mein naqsh-e-aab dikhaayaa gayaa mujhe saahil pe laa ke raasta us paar ho gayaa dariyaa mein Dubne se bachaayaa gayaa mujhe ik roz meri had kaa taayyun kiyaa gayaa phir ek roz had se baDhaayaa gayaa mujhe"

"mili raah vo ki faraar kaa na pata chalaa uDaa sang se to sharaar kaa na pata chalaa jo khinche khinche mujhe lag rahe the yahaan vahaan kisi ek aise hisaar kaa na pata chalaa rahaa jaate jaate na dekh sakne kaa gham hamein vo ghubaar uThaa ki savaar kaa na pata chalaa rahi hijr mein jo ik ek pal ki khabar mujhe to visaal mein shab-e-taar kaa na pata chalaa kai mausamon se talaash mein hai miri nazar kisi gulsitaan se bahaar kaa na pata chalaa"

"qadmon se mere gard-e-safar kaun le gayaa manzil pe raaste ki khabar kaun le gayaa ru-e-ufuq se nur-e-sahar kaun le gayaa is auj tak kamand-e-nazar kaun le gayaa rakh di gai thi qadmon pe us ke utaar kar dastaar jaanti hai ki sar kaun le gayaa is sath par kise thaa miri zaat kaa shuur itni tahon mein aa ke guhar kaun le gayaa sukhe darakht nezon ki surat gaDe hue vo barg o gul vo shaakh o samar kaun le gayaa"

"sadaa vo detaa bhi hogaa to kyaa khabar mujh ko jo sunne de ye mashinon kaa shor-o-shar mujh ko 'ajib dasht huun main bhi ki ek ik zarra uDaae phirtaa hai muddat se dar-ba-dar mujh ko har ik se puchhtaa phirtaa hai meraa naam-o-nishaan guzar gayaa thaa kabhi sahl jaan kar mujh ko havaa vo duur se detaa hai apne daaman ko qarib aataa nahin jaan kar sharar mujh ko main apne qatl kaa ilzaam kisi ko duun 'raahi' milaa hai apnaa hi daaman lahu mein tar mujh ko"

"na miraa zor na bas ab kyaa hai ai giraftaar-e-nafas ab kyaa hai main tire vaaste aaina thaa apni surat ko taras ab kyaa hai daane daane pe utar aae parind banda-e-daam-e-havas ab kyaa hai kis havaa mein hai tu ai abr-e-karam ab baras yaa na baras ab kyaa hai rahaa jab tak rahaa samton kaa zavaal aai aavaaz-e-jaras ab kyaa hai"

"jo mujh pe bhaari hui ek raat achchhi tarah to phir guzar bhi gae saanehaat achchhi tarah main baar baar giraayaa gayaa bulandi se mujhe to ho gayaa haasil sabaat achchhi tarah kitaab saa miraa chehra tiri nigaah mein hai bayaan kar miri zaat o sifaat achchhi tarah tu apne siine se mujh ko yuun hi lagaae rakh samajh luun taa-ki tire dil ki baat achchhi tarah tujhe banaayaa gayaa hai jo ashraf-ul-makhluq samo ke zaat mein rakh kaaenaat achchhi tarah kisi ne zahr milaa kar na de diyaa ho tujhe main chakh to luun tire qand o nabaat achchhi tarah"

"past-o-buland mein jo tujhe rishta chaahiye milne ko tujh se chhat pe mujhe ziina chaahiye ye kaun aa gayaa hai mire us ke darmiyaan divaar hai to us mein mujhe rakhna chaahiye taamir ke liye mujhe darkaar ek umr takhrib ke liye mujhe ik lamha chaahiye yaaron ne meri raah mein divaar khinch kar mashhur kar diyaa ki mujhe saaya chaahiye milne kaa ab nahin jo kisi bhi dukaan mein hindostaan kaa mujhe vo naqsha chaahiye"

"hain aur kai ret ke tufaan mire aage phailegaa abhi aur bayaabaan mire aage baahar nahin koi bhi miri had-e-nazar se makhfi hai koi koi numaayaan mire aage hasti miri sahraa hai saraab us kaa muqaddar aakhir use honaa hai pashemaan mire aage huun miil ke patthar ki tarah raahguzar mein manzil pe nazar rakhte hain insaan mire aage tai ho na saki duri-e-manzil ye alag hai har moD pe raushan rahaa imkaan mire aage kaandhe pe mire bojh rahaa rakht-e-safar kaa yuun niklaa kiye be-sar-o-saamaan mire aage jo sulh-o-safaai mein hain pichhe abhi 'raahi' rahte hain baham dast-o-garebaan mire aage"

"raah se mujh ko haTaa kar le gayaa jaan kaa khatra bataa kar le gayaa kaT miraa ik shakhs apni aan par aur apnaa sar uThaa kar le gayaa ek din dariyaa makaanon mein ghusaa aur divaarein uThaa kar le gayaa haath suraj ke na jab aai nadi aag paani mein lagaa kar le gayaa uDti chingaari ko jugnu jaan kar tifl daaman mein chhupaa kar le gayaa muddaton kaanTe bichhaae raah mein ek din aankhein bichhaa kar le gayaa"

"miri giraft mein hai taaer-e-khayaal miraa magar uDaae liye jaa rahaa hai jaal miraa yaqin itnaa nahin meraa jitnaa nabz kaa hai miri zabaan se suntaa nahin vo haal miraa kamaal ki vo imaarat miri hui mismaar khanDar ki shakl mein baaqi rahaa zavaal miraa fazaa mein jhonk de aandhi ke baad paani bhi uDaai khaak to ab khuun bhi uchhaal miraa zabaan apni badalne pe koi raazi nahin vahi javaab hai us kaa vahi savaal miraa main sar kiye hue baiThaa huun ik nai choTi kuchh aur faasle se dekh ab kamaal miraa"

"vahi saahil vahi manjdhaar mujh ko banaayaa us ne khevan-haar mujh ko zabaan ki dhaar se dekhaa milaa kar lagi kuchh tez kam talvaar mujh ko biThaa rakkhaa mujhe saae mein jis ne giraani thi vahi divaar mujh ko jinhein hai naaz apne faaslon par pakaDne dein zaraa raftaar mujh ko kabhi hoti na phir laDne ki himmat mili ab tak na aisi haar mujh ko kisi ne bhej kar kaaghaz ki kashti bulaayaa hai samundar paar mujh ko kabhi Duubi na teri naav 'raahi' sikhaayaa tairnaa be-kaar mujh ko"

"peD agar unchaa miltaa hai mushkil se saaya miltaa hai mehnat se paisa miltaa hai jaise ko taisaa miltaa hai dariyaa ke riste saagar se qatra qatra jaa miltaa hai sahraa jangal saagar parbat in se hi rasta miltaa hai baiThe baiThe ghumne vaalaa duniyaa kaa naqsha miltaa hai"

"aage aage shar phailaataa jaataa huun pichhe pichhe apni khair manaataa huun patthar ki surat be-his ho jaataa huun kaisi kaisi choTein sahtaa rahtaa huun aakhir ab tak kyuun na tumhein aayaa main nazar jaane kahaan kahaan to dekhaa jaataa huun saanson ke aane jaane se lagtaa hai ik pal jiitaa huun to ik pal martaa huun dariyaa baalu moram Dho kar laataa hai main us kaa sab maal uDaa le aataa huun ab to main haathon mein patthar le kar bhi aaine kaa saamnaa karte Dartaa huun"