Ghazal

"ai husn-e-laala-faam! zaraa aankh to milaa khaali paDe hain jaam! zaraa aankh to milaa kahte hain aankh aankh se milnaa hai bandagi duniyaa ke chhoD kaam! zaraa aankh to milaa kyaa vo na aaj aaeinge taaron ke saath saath tanhaaiyon ki shaam! zaraa aankh to milaa ye jaam ye subu ye tasavvur ki chaandni saaqi kahaan mudaam! zaraa aankh to milaa saaqi mujhe bhi chaahiye ik jaam-e-aarzu kitne lageinge daam! zaraa aankh to milaa paamaal ho na jaae sitaaron ki aabru ai mere khush-khiraam! zaraa aankh to milaa hain raah-e-kahkashaan mein azal se khaDe hue 'saaghar' tire ghulaam! zaraa aankh to milaa"

"bargashta-e-yazdaan se kuchh bhuul hui hai bhaTke hue insaan se kuchh bhuul hui hai taa-hadd-e-nazar shoale hi shoale hain chaman mein phulon ke nigahbaan se kuchh bhuul hui hai jis ahd mein luT jaae faqiron ki kamaai us ahd ke sultaan se kuchh bhuul hui hai hanste hain miri surat-e-maftun pe shagufe mere dil-e-naadaan se kuchh bhuul hui hai huron ki talab aur mai o saaghar se hai nafrat zaahid tire irfaan se kuchh bhuul hui hai"

"mataa-e-kausar-o-zamzam ke paimaane tiri aankhein farishton ko banaa deti hain divaane tiri aankhein jahaan-e-rang-o-bu uljhaa huaa hai un ke Doron mein lagi hain kaakul-e-taqdir suljhaane tiri aankhein ishaaron se dilon ko chheD kar iqraar karti hain uThaati hain bahaar-e-nau ke nazraane tiri aankhein vo divaane zamaam-e-laala-o-gul thaam lete hain jinhein mansub kar deti hain viraane tiri aankhein shagufon ko sharaaron kaa machaltaa ruup deti hain haqiqat ko banaa deti hain afsaane tiri aankhein"

"saaqi ki ik nigaah ke afsaane ban gae kuchh phuul TuuT kar mire paimaane ban gae kaaTi jahaan tasavvur-e-jaanaan mein ek shab kahte hain log us jagah but-khaane ban gae jin par na saae zulf-e-ghazaalaan ke paD sake ehsaas ki nigaah mein viraane ban gae jo pi sake na surkh labon ki tajalliyaan duniyaa ke tajrabaat se anjaane ban gae 'saaghar' vahi maqaam hai ik manzil-e-faraaz apne bhi jis maqaam pe begaane ban gae"

"har shai hai pur-malaal baDi tez dhuup hai har lab pe hai savaal baDi tez dhuup hai chakraa ke gir na jaaun main is tez dhuup mein mujh ko zaraa sambhaal baDi tez dhuup hai de hukm baadalon ko khayaabaan-nashin huun jaam-o-subu uchhaal baDi tez dhuup hai mumkin hai abr-e-rahmat-e-yazdaan baras paDe zulfon ki chhaanv Daal baDi tez dhuup hai ab shahr-e-aarzu mein vo raanaaiyaan kahaan hain gul-kade niDhaal baDi tez dhuup hai samjhi hai jis ko saaya-e-ummid aql-e-khaam 'saaghar' kaa hai khayaal baDi tez dhuup hai"

"ek naghma ek taaraa ek ghuncha ek jaam ai gham-e-dauraan gham-e-dauraan tujhe meraa salaam zulf aavaara garebaan chaak ghabraai nazar in dinon ye hai jahaan mein zindagaani kaa nizaam chand taare TuuT kar daaman mein mere aa gire main ne puchhaa thaa sitaaron se tire gham kaa maqaam kah rahe hain chand bichhDe rahravon ke naqsh-e-paa ham kareinge inqalaab-e-justuju kaa ehtimaam paD gaiin pairaahan-e-subh-e-chaman par silvaTein yaad aa kar rah gai hai be-khudi ki ek shaam teri ismat ho ki ho mere hunar ki chaandni vaqt ke baazaar mein har chiiz ke lagte hain daam ham banaaeinge yahaan 'saaghar' nai tasvir-e-shauq ham takhayyul ke mujaddid ham tasavvur ke imaam"

"baat phulon ki sunaa karte the ham kabhi sher kahaa karte the mishalein le ke tumhaare gham ki ham andheron mein chalaa karte the ab kahaan aisi tabiat vaale choT khaa kar jo duaa karte the tark-e-ehsaas-e-mohabbat mushkil haan magar ahl-e-vafaa karte the bikhri bikhri hui zulfon vaale qaafile rok liyaa karte the aaj gulshan mein shagufe 'saaghar' shikva-e-baad-e-sabaa karte the"

"jhuum kar gaao main sharaabi huun raqs farmaao main sharaabi huun ek sajda ba-naam-e-mai-khaana dosto aao main sharaabi huun log kahte hain raat bait chuki mujh ko samjhaao main sharaabi huun aaj in reshmi ghaTaaon ko yuun na bikhraao main sharaabi huun haadse roz hote rahte hain bhuul bhi jaao main sharaabi huun mujh pe zaahir hai aap kaa baatin munh na khulvaao main sharaabi huun"

"taaron se meraa jaam bharo main nashe mein huun ai saakinaan-e-khuld suno main nashe mein huun kuchh phuul khil rahe hain sar-e-shaakh-e-mai-kada tum hi zaraa ye phuul chuno main nashe mein huun Thahro abhi to subh kaa maaraa hai zau-fishaan dekho mujhe fareb na do main nashe mein huun nashsha to maut hai gham-e-hasti ki dhuup mein bikhraa ke zulf saath chalo main nashe mein huun mela yuun hi rahe ye sar-e-rahguzaar-e-zist ab jaam saamne hi rakho main nashe mein huun paael chhanak rahi hai nigaar-e-khayaal ki kuchh ehtimaam-e-raqs karo main nashe mein huun main Dagmagaa rahaa huun bayaabaan-e-hosh mein mere abhi qarib raho main nashe mein huun hai sirf ik tabassum-e-rangin bahut mujhe 'saaghar' ba-dosh laala-rukho main nashe mein huun"

"chaandni ko rasul kahtaa huun baat ko baa-usul kahtaa huun jagmagaate hue sitaaron ko tere paanv ki dhuul kahtaa huun jo chaman ki hayaat ko Das le us kali ko babul kahtaa huun ittifaaqan tumhaare milne ko zindagi kaa husul kahtaa huun aap ki saanvli si murat ko zauq-e-yazdaan ki bhuul kahtaa huun jab mayassar hon saaghar-o-minaa barq-paaron ko phuul kahtaa huun"