makin jab niind ke saae mein sustaane lagein 'taabish' — Abbas Tabish

jhonke ke saath chhat gai dastak ke saath dar gayaa
taaza havaa ke shauq mein meraa to saaraa ghar gayaa

mohabbat ek dam dukh kaa mudaavaa kar nahin deti
ye titli baiThti hai zakhm par aahista aahista

'taabish' jo guzarti hi nahin shaam ki had se
sochein to vahin raat sahar-khez bahut hai

ek muddat se miri maan nahin soi 'taabish'
main ne ik baar kahaa thaa mujhe Dar lagtaa hai

main jis sukun se baiThaa huun is kinaare par
sukun se lagtaa hai meraa qayaam aakhiri hai

muddat ke baad khvaab mein aayaa thaa meraa baap
aur us ne mujh se itnaa kahaa khush rahaa karo

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

safar mein aise kai marhale bhi aate hain
har ek moD pe kuchh log chhuT jaate hain

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

jo nahin hai vaqt kaa ham-safar use subh-o-shaam ki kyaa khabar
ho kisi kaa vaqt pe kyaa asar bhalaa vaqt kis kaa ghulaam hai

kisi alaav kaa shoala bhaDak ke boltaa hai
safar kaThin hai magar ek baar aakhiri baar