thaam rakkhi hai ham ne chaal apni — Abdul Wahab Sukhan

jab bhi ye sochne lagtaa huun ki kaun apnaa hai
zehn mein aa ke kai naam nikal jaate hain

jal rahe hain abhi kamzor aqidon ke charaagh
jis kaa ji chaahe zamaane mein khudaa ho jaae

mohabbaton ke hasin baab se zaraa aage
kitaab-e-zist mein miltaa hai gumrahi kaa varaq

phans hi jaate hain kisi daam mein aakhir ham log
laakh kahte hain chhalaave mein nahin aaeinge

vo aise moD par mujh ko milaa thaa
main tanhaai kaa aadi ho chukaa thaa

ye pyaar kaa jazba tire kuchh kaam to aae
meraa nahin bantaa hai to ban aur kisi kaa

zamaana laakh sitaaron ko chhu ke aa jaae
abhi dilon ko magar haajat-e-rafu hai vahi

kuchh aur din abhi is jaa qayaam karnaa thaa
yahaan charaagh vahaan par sitaara dharnaa thaa

taa-falak le gai betaabi-e-dil tab bole
hazrat-e-ishq ki pahlaa hai ye ziinaa apnaa

shab-e-vaada fasil-e-hijr se aage chamaktaa hai tiraa ism-e-sitaara-ju
ki jaise koi paivand-e-ridaa-e-subh aa jaae kisi qindil ki zad mein

chaand kaa qurb lagaa kaisaa chalo puchh aaein
aasmaanon ke safar se vo palaT aayaa hai

mire sehan par khulaa aasmaan rahe ki main
use dhuup chhaanv mein baanTanaa nahin chaahtaa