ik intizaar mein qaaem hai is charaagh ki lau — Abdurrahman Wasif

abhi se mat mire kirdaar ko maraa huaa jaan
tire fasaane mein zikr aaegaa dobaaraa miraa

saath dene ki baat saare karein
aur nibhaae koi koi mire dost

mujhe ab aa gae hain nafraton ke biij bone
so meraa haq ye bantaa hai ki sardaari karungaa

koi charaagh miri samt bhi ravaana karo
bahut dinon se andheraa mire vajud mein hai

ye teraa maal kisi roz Das hi legaa tujhe
agar tu is mein se khairaat kuchh nahin karegaa

thaamungaa nahin ab ke munaajaat kaa daaman
dil tujh se uThaa aur tire dar se uThaa main

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

tamaam umr tire intizaar mein hamdam
khizaan-rasida rahaa huun bahaar kar mujh ko

bajaae siine ke aankhon mein dil dhaDaktaa hai
ye intizaar ke lamhe ajiib hote hain

kisi ke raste pe kaise nazrein jamaae rakkhun
abhi to karnaa mujhe hai khud intizaar meraa

phunkaa hai kis ne gosh-e-mohabbat mein ai khudaa
afsun-e-intizaar tamannaa kahein jise