abhi se mat mire kirdaar ko maraa huaa jaan — Abdurrahman Wasif

ik intizaar mein qaaem hai is charaagh ki lau
ik ehtimaam mein kamre kaa dar khulaa huaa hai

saath dene ki baat saare karein
aur nibhaae koi koi mire dost

mujhe ab aa gae hain nafraton ke biij bone
so meraa haq ye bantaa hai ki sardaari karungaa

koi charaagh miri samt bhi ravaana karo
bahut dinon se andheraa mire vajud mein hai

ye teraa maal kisi roz Das hi legaa tujhe
agar tu is mein se khairaat kuchh nahin karegaa

thaamungaa nahin ab ke munaajaat kaa daaman
dil tujh se uThaa aur tire dar se uThaa main

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

jism-e-aazaadi mein phunki tu ne majburi ki ruuh
khair jo chaahaa kiyaa ab ye bataa ham kyaa karein

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

umr bhar kaun nibhaataa hai ta'alluq itnaa
ai miri jaan ke dushman tujhe allaah rakkhe

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham