khatra thaa aandhiyon se magar haae-re nasib — Abrar Asar

na to aaftaab ki hai gharaz na talab mujhe koi chaand ki
vo charaagh mujh ko 'aziz hai miri zulmaton ko jo nuur de

us ke chehre pe thaa namak aisaa
aaj tak zaaiqa hai honTon par

pukhta agar hai 'azm to socho na dosto
chhoTi si naav aur samundar vishaal hai

chaman mein shor hai bhanvron ki chaahat kaa bahut lekin
mohabbat gul ki bulbul se hai khaamoshi ke parde mein

chaahe kitni bhi andheri shab ho
dekhnaa phir se ujaalaa hogaa

main agar aaina nahin hotaa
koi mujh se khafaa nahin hotaa

duur ham se hain vo to kyaa Dar hai
paas hai apne aarsi dil ki

aisi taraqqi par to ronaa bantaa hai
jis mein dahshat-gard corona bantaa hai

ham mai-kashon ko Dar nahin marne kaa mohtasib
firdaus mein bhi sunte hain nahr-e-sharaab hai

qayaamat kaa mujhe Dar kyaa jo kal aani hai aaj aae
tumhaare saath ki kheli hai meri dekhi-bhaali hai

main khud ko marte hue dekh kar bahut khush huun
ye Dar bhi hai ki miri aankh khul na jaae kahin

buzurgon kaa mire dil se abhi tak Dar nahin jaataa
ki jab tak jaagti rahti hai maan main ghar nahin jaataa