chaman mein shor hai bhanvron ki chaahat kaa bahut lekin — Abrar Asar

na to aaftaab ki hai gharaz na talab mujhe koi chaand ki
vo charaagh mujh ko 'aziz hai miri zulmaton ko jo nuur de

us ke chehre pe thaa namak aisaa
aaj tak zaaiqa hai honTon par

pukhta agar hai 'azm to socho na dosto
chhoTi si naav aur samundar vishaal hai

khatra thaa aandhiyon se magar haae-re nasib
baad-e-sabaa charaagh bujhaa kar chali gai

chaahe kitni bhi andheri shab ho
dekhnaa phir se ujaalaa hogaa

main agar aaina nahin hotaa
koi mujh se khafaa nahin hotaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

nahin ki jurm-e-mohabbat kaa e'tiraaf nahin
magar huun khush ki miri ye khataa muaaf nahin

kaisi kashish hai ishq ke TuuTe mazaar mein
mela lagaa huaa hai hamaare dayaar mein

ab tum bhi zaraa husn-e-jahaan-soz ko roko
ham to dil-e-betaab ko samjhaae hue hain