mujhe gum-shuda dil kaa gham hai to ye hai — Afsar Allahabadi

tumhaare hijr mein kyuun zindagi na mushkil ho
tumhin jigar ho tumhin jaan ho tumhin dil ho

na ho yaa rab aisi tabiat kisi ki
ki hans hans ke dekhe musibat kisi ki

khabar deti hai yaad kartaa hai koi
jo baandhaa hai hichki ne taar aate aate

hamaaraa koh-e-gham kyaa sang-e-khaaraa hai jo kaT jaataa
agar mar mar ke zinda kohkan hotaa to kyaa hotaa

hasinon ki donon adaaein hain dilbar
kisi ki hayaa to sharaarat kisi ki

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

koi pursaan nahin ghamon kaa 'zafar'
dekhne mein hazaar rishte hain

bahut achchhaa huaa aansu na nikle meri aankhon se
bapaa mahfil mein ik taaza qayaamat aur ho jaati