asaas-e-jism uThaaun nae sire se magar — Aftab Hussain

ye soch kar bhi to us se nibaah ho na sakaa
kisi se ho bhi sakaa hai miraa guzaara kahin

apne hi dam se charaaghaan hai vagarna 'aaftaab'
ik sitaara bhi miri viraan shaamon mein nahin

kyaa khabar mere hi siine mein paDi soti ho
bhaagtaa phirtaa huun jis rog-bhari raat se main

kin manzaron mein mujh ko mahaknaa thaa 'aaftaab'
kis regzaar par huun main aa kar khilaa huaa

kab tak saath nibhaataa aakhir
vo bhi duniyaa mein rahtaa hai

dil-e-muztar vafaa ke baab mein ye jald-baazi kyaa
zaraa ruk jaaein aur dekhein natija kyaa nikaltaa hai

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

aarzu thi ek din tujh se milun
mil gayaa to sochtaa huun kyaa karun

tumhaari bazm se nikle to ham ne ye sochaa
zamin se chaand talak kitnaa faasla hogaa

apne ehsaas ki shiddat ko bujhaane ke liye
main nai tarz ke khush-fikr risaale maangon

pahle nisaab-e-aql huaa ham se intisaab
phir yuun huaa ki qatl bhi ham kar diye gae