apne ehsaas ki shiddat ko bujhaane ke liye — Akmal Imaam

fasaad rokne kam-zarf log pahunche hain
gharon mein rah gae raushan zamir jitne the

meraa saaya bhi baDh gayaa mujh se
is saliqe se ghaT gayaa huun main

aarzu Tiis karb tanhaai
khud mein kitnaa simaT gayaa huun main

nai tahqiq ne qatron se nikaale dariyaa
ham ne dekhaa hai ki zarron se zamaane nikle

zindagi ke bahut qarib na jaa
faasla kuchh to apne dhyaan mein rakh

har ek harf se jiine kaa fan numaayaan ho
kuchh is tarah ki ibaarat nisaab mein likhiye

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

taa-umr apni fikr o riyaazat ke baavajud
khud ko kisi sazaa se bachaanaa muhaal hai

sochaa hai ki ab kaar-e-masihaa na kareinge
vo khuun bhi thukegaa to parvaa na kareinge

kisi sabab se agar boltaa nahin huun main
to yuun nahin ki tujhe sochtaa nahin huun main

us ke rukhsaar pe hai aur tire honT pe til
tilmilaane ki ijaazat nahin di jaaegi