jahaan tak Dubne kaa Dar hai tum ko — Ain Irfan

miraa vajud jo patthar dikhaai detaa hai
tamaam umr ki shishagari kaa haasil hai

bahut nazdik the tasvir mein ham
magar vo faasla jo dikh rahaa thaa

be-maqsad mahfil se behtar tanhaai
be-matlab baaton se achchhi khaamoshi

bas ek dhun thi samundar ko paar karne ki
main jaantaa thaa samundar ke paar kuchh bhi na thaa

gaamzan hain ham musalsal ajnabi manzil ki samt
zindagi ki aarzu mein zindagi khote hue

haadisa kaun saa huaa pahle
raat aai ki din Dhalaa pahle

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

donon ke dil mein khauf thaa maidaan-e-jang mein
donon kaa khauf faasla thaa darmiyaan kaa

kyaa kyaa dilon kaa khauf chhupaanaa paDaa hamein
khud Dar gae to sab ko Daraanaa paDaa hamein

din ke siine mein dhaDakte hue lamhon ki qasam
shab ki raftaar-e-subuk-gaam se ji Dartaa hai

Dar rahaa huun ki sar-e-shaam tiri aankhon mein
main ne jo vaqt guzaaraa hai koi dekh na le

paDhtaa hai baDe shauq se vo meri kitaabein
jis baat se Dartaa huun vahi baat na paDh le