maan ne likhaa hai khat mein jahaan jaao khush raho — Ajmal Ajmali

kitni tavil kyuun na ho baatil ki zindagi
har raat kaa hai subh muqaddar na bhulnaa

hazaar manzil-e-gham se guzar chuke lekin
abhi junun-e-mohabbat ki ibtidaa bhi nahin

jab bhi miltaa huun vahi chehra liye
bad-duaa detaa hai aaina mujhe

taar-e-nazar bhi gham ki tamaazat se khushk hai
vo pyaas hai mile to samundar sameT luun

aarzu thi khinchte ham bhi koi aks-e-hayaat
kyaa karein ab ke lahu aankhon se Tapkaa hi nahin

vaqt-e-safar qarib hai bistar sameT luun
bikhraa huaa hayaat kaa daftar sameT luun

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

udaas dekh ke mujh ko chaman dikhaataa hai
kai baras mein huaa hai mizaaj-daan sayyaad

kis munh se karein un ke taghaaful ki shikaayat
khud ham ko mohabbat kaa sabaq yaad nahin hai

jab na thaa zabt to kyuun aae ayaadat ke liye
tum ne kaahe ko miraa haal-e-pareshaan dekhaa

duniyaa mein hain kaam bahut
mujh ko itnaa yaad na aa