kabhi nazar ki taraf dekhtaa hai khud manzar — Ajmal Siddiqui

har ek subh vazu karti hain miri aankhein
ki shaayad aaj to aa jaae vo habib nazar

bol paDtaa to miri baat miri hi rahti
khaamushi ne hain diye sab ko fasaane kyaa kyaa

kyaa kyaa na paDhaa is maktab mein, kitne hi hunar sikhe hain yahaan
izhaar kabhi aankhon se kiyaa kabhi had se sivaa bebaak huaa

jis din se gayaa vo jaan-e-ghazal har misre ki surat bigDi
har lafz pareshaan dikhtaa hai, is darja varaq namnaak huaa

kabhi khauf thaa tire hijr kaa kabhi aarzu ke zavaal kaa
rahaa hijr-o-vasl ke darmiyaan tujhe kho sakaa na main paa sakaa

vo meraa ho ki na ho kyaa gharaz mujhe is se
havas charaagh ki tum ko mujhe hai bhaataa nuur

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vahaan hamaaraa koi muntazir nahin phir bhi
hamein na rok ki ghar jaanaa chaahte hain ham

jab talak shisha rahaa main baar-haa toDaa gayaa
ban gayaa patthar to sab ne devtaa maanaa mujhe

kuchh phulon ki khaatir bhi kuchh phulon kaa
sab se achchhaa rang churaanaa paDtaa hai

ghurur bhi jo karun main to aajizi ho jaae
khudi mein lutf vo aae ki be-khudi ho jaae