har ek samt tiri yaad kaa dhundalkaa hai — Akash Arsh

sukhan-aabad mein saudaaiyon ki dhuum sahi
'mir'-ji she'r ke fan mein mire ustaad raho

sab apni zaat mein ik anjuman ke mujrim hain
kisi vajud mein kuchh fard jaisaa hai hi nahin

kisi parind ki chikhon ne sang-baari ki
sukut-e-shaam kaa shisha bikhar gayaa mujh mein

main khud ko dekhtaa huun aur bhi hiqaarat se
jab apnaa martaba taslim karne lagtaa huun

ye kaun tere sivaa kar sakaa udaas mujhe
tire khayaal ne chheDi thi guftugu kis ki

baiThaa huaa huun lag ke dariche se mahv-e-yaas
ye shaam aaj mere baraabar udaas hai

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

chaman mein khushk-saali par hai khush sayyaad ki ab khud
parinde peT ki khaatir asir-e-daam hote hain

umr guzri hai magar khud se judaa kar na sake
bhulne vaale tiri yaad mein kyaa rakkhaa hai

miri yaadon mein taDpoge ye vaa'da main nahin kartaa
magar mahsus to hogaa tumhein meraa na honaa bhi

zindagi aur zindagi ki yaadgaar
parda aur parde pe kuchh parchhaaiyaan