kuchh mujhe bhi yahaan qaraar nahin — Akhtar Hoshiyarpuri

log nazron ko bhi paDh lete hain
apni aankhon ko jhukaae rakhnaa

chaman ke rang-o-bu ne is qadar dhokaa diyaa mujh ko
ki main ne shauq-e-gul-bosi mein kaanTon par zabaan rakh di

Takraa ke sar ko apnaa lahu aap chaaTte
achchhaa huaa ki dasht mein divaar-o-dar na the

baarhaa ThiThkaa huun khud bhi apnaa saaya dekh kar
log bhi katraae kyaa kyaa mujh ko tanhaa dekh kar

nikal kar aa gae hain jangalon mein
makaan ko laa-makaan karnaa paDaa hai

main apni zaat ki tashrih kartaa phirtaa thaa
na jaane phir kahaan aavaaz kho gai meri

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

jafaa ki baatein sadaa banaanaa vafaa ki baatein kabhi na karnaa
khudaa ke ghar mein kami nahin hai kiye mein apne kami na karnaa

raah mein gham-zada-e-ishq ko kyaa Toko ho
apni haalat mein giraftaar chalaa jaataa hai

main Duubaa jaa rahaa huun un sadaaon ke bhanvar mein
mujhe ab chaaron jaanib se pukaaraa jaa rahaa hai