main apni zaat ki tashrih kartaa phirtaa thaa — Akhtar Hoshiyarpuri

chaman ke rang-o-bu ne is qadar dhokaa diyaa mujh ko
ki main ne shauq-e-gul-bosi mein kaanTon par zabaan rakh di

Takraa ke sar ko apnaa lahu aap chaaTte
achchhaa huaa ki dasht mein divaar-o-dar na the

baarhaa ThiThkaa huun khud bhi apnaa saaya dekh kar
log bhi katraae kyaa kyaa mujh ko tanhaa dekh kar

kuchh mujhe bhi yahaan qaraar nahin
kuchh tiraa gham bhi dar-ba-dar hai yahaan

nikal kar aa gae hain jangalon mein
makaan ko laa-makaan karnaa paDaa hai

log nazron ko bhi paDh lete hain
apni aankhon ko jhukaae rakhnaa

kyon tasavvur mein ji rahaa huun main
jab haqiqat mein mar hi jaanaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

ye bastiyaan baDi gunjaan hain magar in mein
kisi gali mein nahin koi ghar tumhaare sivaa

judaai se ziyaada jaan-levaa
mohabbat mein mohabbat ki kami hai