nikal kar aa gae hain jangalon mein — Akhtar Hoshiyarpuri

log nazron ko bhi paDh lete hain
apni aankhon ko jhukaae rakhnaa

chaman ke rang-o-bu ne is qadar dhokaa diyaa mujh ko
ki main ne shauq-e-gul-bosi mein kaanTon par zabaan rakh di

Takraa ke sar ko apnaa lahu aap chaaTte
achchhaa huaa ki dasht mein divaar-o-dar na the

baarhaa ThiThkaa huun khud bhi apnaa saaya dekh kar
log bhi katraae kyaa kyaa mujh ko tanhaa dekh kar

kuchh mujhe bhi yahaan qaraar nahin
kuchh tiraa gham bhi dar-ba-dar hai yahaan

main apni zaat ki tashrih kartaa phirtaa thaa
na jaane phir kahaan aavaaz kho gai meri

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

qabaa-e-zard pahan kar vo bazm mein aayaa
gul-e-hinaa ko hatheli mein thaam kar baiThaa

phabaa hai rukh pe tire khush-numaa sanam lekin
hamesha gul pe ye shabnam rahe rahe na rahe

fasurda-dil kabhi khalvat na anjuman mein rahe
bahaar ho ke rahe ham to jis chaman mein rahe