mohabbat ke iqraar se sharm kab tak — Akhtar Shirani

kis ko fursat thi zamaane ke sitam sahne ki
gar na us shokh ki aankhon kaa ishaaraa hotaa

ab to miliye bas laDaai ho chuki
ab to chaliye pyaar ki baatein karein

zindagi kitni masarrat se guzarti yaa rab
aish ki tarah agar gham bhi gavaaraa hotaa

yaad aao mujhe lillaah na tum yaad karo
meri aur apni javaani ko na barbaad karo

muddatein ho gaiin bichhDe hue tum se lekin
aaj tak dil se mire yaad tumhaari na gai

jo bhi buraa bhalaa hai allaah jaantaa hai
bande ke dil mein kyaa hai allaah jaantaa hai

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

andheri raat ko main roz-e-ishq samjhaa thaa
charaagh tu ne jalaayaa to dil bujhaa meraa

kuchh kah do jhuuT hi ki tavaqqo bandhi rahe
toDo na aasraa dil-e-ummid-vaar kaa

sarv ko dekh ke kahtaa hai dil-e-basta-e-zulf
ham giraftaar hain is baagh mein aazaad hain sab