aas Duubi to dil huaa raushan — Akhtar Ziai

koi ilaaj-e-gham-e-zindagi bataa vaaiz
sune hue jo fasaane hain phir sunaa na mujhe

dafatan aandhiyon ne rukh badlaa
naa-gahaan aarzu ke baagh jale

bhulaa chuke hain zamin o zamaan ke sab qisse
sukhan-taraaz hain lekin khalaa mein rahte hain

main baDaa ho gayaa huun magar bachpanaa
mere dil se kabhi bhi gayaa hi nahin

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

na ho ehsaas to saaraa jahaan hai be-his-o-murda
gudaaz-e-dil ho to dukhti ragein milti hain patthar mein

'saif' andaaz-e-bayaan rang badal detaa hai
varna duniyaa mein koi baat nai baat nahin

apnaa ye charaagh-e-dil maddham hi sahi lekin
duniyaa ke andheron se tanhaa hi ye laDtaa hai