had-e-imkaan se aage main jaanaa chaahtaa huun par — Alok Yadav

annyaae ne bhar di hai bahut aag dilon mein
lanka hi kahin is mein jo jal jaae to achchhaa

mire liye hain musibat ye aaina-khaane
yahaan zamir miraa be-naqaab rahtaa hai

dilkashi thi unsiyat thi yaa mohabbat yaa junun
sab maraahil tujh se jo mansub the achchhe lage

nai naslon ke haathon mein bhi taabinda rahegaa
main mil jaaungaa miTTi mein qalam zinda rahegaa

pyaar kaa donon pe aakhir jurm saabit ho gayaa
ye farishte aaj jannat se nikaale jaaeinge

vaaiz safar to meraa bhi thaa ruuh ki taraf
par kyaa karun ki raah mein ye jism aa paDaa

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vahi do-chaar chehre ajnabi se
unhin ko phir se dohraanaa paDegaa

nishaan-e-manzil-e-jaanaan mile mile na mile
maze ki chiiz hai ye zauq-e-jushtuju meraa

kisi se koi bhi ummid rakhnaa chhoD kar dekho
to ye rishta nibhaanaa kis qadar aasaan ho jaae

dil ko to bahut pahle se dhaDkaa saa lagaa thaa
paanaa tiraa shaayad tujhe khone ke liye hai