insaan ki niyyat kaa bharosa nahin koi — Anjum Khaleeq

kaisaa firaaq kaisi judaai kahaan kaa hijr
vo jaaegaa agar to khayaalon mein aaegaa

zabaan-bandi ke mausam mein gali-kuchon ki mat puchho
parindon ke chahakne se shajar aabaad hote hain

zamin ki god mein itnaa sukun thaa 'anjum'
ki jo gayaa vo safar ki thakaan bhuul gayaa

allaah ke ghar der hai andher nahin hai
tu yaas ke mausam mein bhi ummid kaa fan siikh

vahshat-e-hijr bhi tanhaai bhi main bhi 'anjum'
jab ikaTThe hue sab ek ghazal aur kahi

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

uThaa hi laayaa sabhi raaste vo kaandhon par
yaqin us pe na kartaa to main kidhar jaataa

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

hamein khudaa pe bharosa hai naa-khudaa pe nahin
khudaa jo detaa hai vo naa-khudaa nahin detaa

main ghar ko phunk rahaa thaa baDe yaqin ke saath
ki teri raah mein pahlaa qadam uThaanaa thaa

bas isi ummid pe hotaa gayaa barbaad main
gar kabhi bikhraa to aa kar tu sambhaalegaa mujhe