kaisaa firaaq kaisi judaai kahaan kaa hijr — Anjum Khaleeq

kaho kyaa mehrbaan naa-mehrbaan taqdir hoti hai
kahaa maan ki duaaon mein baDi taasir hoti hai

zabaan-bandi ke mausam mein gali-kuchon ki mat puchho
parindon ke chahakne se shajar aabaad hote hain

zamin ki god mein itnaa sukun thaa 'anjum'
ki jo gayaa vo safar ki thakaan bhuul gayaa

allaah ke ghar der hai andher nahin hai
tu yaas ke mausam mein bhi ummid kaa fan siikh

vahshat-e-hijr bhi tanhaai bhi main bhi 'anjum'
jab ikaTThe hue sab ek ghazal aur kahi

insaan ki niyyat kaa bharosa nahin koi
milte ho to is baat ko imkaan mein rakhnaa

kitni be-sud judaai hai ki dukh bhi na milaa
koi dhoka hi vo detaa ki main pachhtaa saktaa

ye khubi hai ki naa-khubi magar main
alag chaltaa huun apne kaarvaan se

kyuun baDhaate ho ikhtilaat bahut
ham ko taaqat nahin judaai ki

tire firaaq mein dil kaa ajiib aalam hai
na kuchh khumaar se baDh kar na kuchh khumaar se kam

us ke vaadon se itnaa to saabit huaa us ko thoDaa saa paas-e-taalluq to hai
ye alag baat hai vo hai vaada-shikan ye bhi kuchh kam nahin us ne vaade kiye

fikr-e-jahaan dard-e-mohabbat firaaq-e-yaar
kyaa kahiye kitne gham hain miri zindagi ke saath