divaar-e-zindaan ke pichhe — Anwar Shuoor

aadmi ke liye ronaa hai baDi baat 'shuur'
hans to sakte hain sab insaan hansi mein kyaa hai

miri hayaat hai bas raat ke andhere tak
mujhe havaa se bachaae rakho savere tak

kabhi rotaa thaa us ko yaad kar ke
ab aksar be-sabab rone lagaa huun

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

koi zanjir nahin taar-e-nazar se mazbut
ham ne is chaand pe Daali hai kamand aankhon se

'shuur' sirf iraade se kuchh nahin hotaa
amal hai shart iraade sabhi ke hote hain

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

be-niyaaz-e-dahr kar detaa hai ishq
be-zaron ko laal-o-zar detaa hai ishq

na puchho husn ki taarif ham se
mohabbat jis se ho bas vo hasin hai

rah gayaa dard dil ke pahlu mein
ye jo ulfat thi dard-e-sar na hui

main hikaayat-e-dil-e-be-navaa mein ishaarat-e-gham-e-jaavidaan
main vo harf-e-aakhir-e-motabar jo likhaa gayaa na paDhaa gayaa