kabhi rotaa thaa us ko yaad kar ke — Anwar Shuoor

aadmi ke liye ronaa hai baDi baat 'shuur'
hans to sakte hain sab insaan hansi mein kyaa hai

miri hayaat hai bas raat ke andhere tak
mujhe havaa se bachaae rakho savere tak

divaar-e-zindaan ke pichhe
jurm-e-mohabbat mein baiThaa huun

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

koi zanjir nahin taar-e-nazar se mazbut
ham ne is chaand pe Daali hai kamand aankhon se

'shuur' sirf iraade se kuchh nahin hotaa
amal hai shart iraade sabhi ke hote hain

mere khvaabon ke jharokon ko sajaate rahiye
na sahi vasl magar yaad to aate rahiye

mere siine se nikaalo miri buniyaad ki jaan
itni aasaani se viraan nahin hotaa main

ye ajnabi si manzilein aur raftagaan ki yaad
tanhaaiyon kaa zahr hai aur ham hain dosto

lobaan mein chingaari jaise koi rakh jaae
yuun yaad tiri shab bhar siine mein sulagti hai

dil to lete ho magar ye bhi rahe yaad tumhein
jo hamaaraa na huaa kab vo tumhaaraa hogaa

hamein islaam se itnaa ta'alluq hai abhi baaqi
buton se jab bigaDti hai khudaa ko yaad karte hain