miri hayaat hai bas raat ke andhere tak — Anwar Shuoor

aadmi ke liye ronaa hai baDi baat 'shuur'
hans to sakte hain sab insaan hansi mein kyaa hai

divaar-e-zindaan ke pichhe
jurm-e-mohabbat mein baiThaa huun

kabhi rotaa thaa us ko yaad kar ke
ab aksar be-sabab rone lagaa huun

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

koi zanjir nahin taar-e-nazar se mazbut
ham ne is chaand pe Daali hai kamand aankhon se

'shuur' sirf iraade se kuchh nahin hotaa
amal hai shart iraade sabhi ke hote hain

kam-umri mein sunet hain
mar jaate hain achchhe log

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

saaqiyaa aisaa pilaa de mai kaa mujh ko jaam talkh
zindagi dushvaar ho aur ho mujhe aaraam talkh

zindagi naam isi mauj-e-mai-e-naab kaa hai
mai-kade se jo uThe daar-o-rasan tak pahunche

dil diyaa vahshat liyaa aur khud ko rusvaa kar liyaa
mukhtasar si zindagi mein main ne kyaa kyaa kar liyaa