do ghaDi niind ki mohlat hai vo gham taak mein hai — Aqeel Abbas

jaane is vaqt kahaan phone paDaa ho us kaa
jaane is vaqt vo kis shakhs ki aaghosh mein ho

sipah-gari kaa hunar bhi sukhan-vari bhi ho
main chaahtaa huun ki lashkar bhi ho pari bhi ho

ek bosa udhaar hai tum par
aur chaae bhi tez patti ki

khudaa ko khat likhungaa khud-kushi kaa
likhungaa main resign kar rahaa huun

safar nigal gae ham ko vagarna ham ne bhi
kahin pahunch ke kisi ko gale lagaanaa thaa

lams-e-husn-e-'ajib ki khvaahish
sar uThaati thi maar di main ne

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

phir is ke baa'd patthar ho gayaa aaankhon kaa paani
jab apne gham mein rone se kiyaa inkaar main ne

bas us ki pahchaan yahi hai
aankh mein aansu bharne vaalaa

main baat karne lagaa thaa ki lafz gunge hue
lughat ke dasht mein kis ko sadaa lagaaungaa main