jangal mein udaasi ke rahoge bhalaa kab tak — Arman Khan Arman

kar li hai mohabbat to khataa kyon nahin karte
jab aag lagaa li hai to jal kyon nahin jaate

talkhiyaan khun-e-jigar ki shaa'iri mein ghol kar
chand misre' laaein hain ham bhi sunaane ke liye

nae mizaaj ke logon ko kis liye aakhir
qadim taur-tariqon ke bas mein rahnaa paDaa

kuchh lutf is tarah hai musalsal safar ke saath
manzil bhi saamne ho to rasta na paae dil

nazar to pher mire kaaghazi badan ki taraf
abhi ye zarb-e-musalsal se taar-taar nahin

yak-lakht jal ke khaak mein milne kaa kyaa mazaa
parvaane se kaho ki vo pahle jalaae dil

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

lams-e-sadaa-e-saaz ne zakhm nihaal kar diye
ye to vahi hunar hai jo dast-e-tabib-e-jaan mein thaa

jal uThein yaadon ki qindilein sadaaein Duub jaaein
dar-haqiqat khaamushi sahraa bhi hai dariyaa bhi hai

phir is ke baa'd patthar ho gayaa aaankhon kaa paani
jab apne gham mein rone se kiyaa inkaar main ne