aalaam-e-rozgaar ko aasaan banaa diyaa — Asghar Gondvi

sau baar tiraa daaman haathon mein mire aayaa
jab aankh khuli dekhaa apnaa hi garebaan thaa

kyaa mastiyaan chaman mein hain josh-e-bahaar se
har shaakh-e-gul hai haath mein saaghar liye hue

chalaa jaataa huun hanstaa kheltaa mauj-e-havaadis se
agar aasaaniyaan hon zindagi dushvaar ho jaae

zaahid ne miraa haasil-e-imaan nahin dekhaa
rukh par tiri zulfon ko pareshaan nahin dekhaa

yuun muskuraae jaan si kaliyon mein paD gai
yuun lab-kushaa hue ki gulistaan banaa diyaa

pahli nazar bhi aap ki uff kis balaa ki thi
ham aaj tak vo choT hain dil par liye hue

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ab khushi hai na koi dard rulaane vaalaa
ham ne apnaa liyaa har rang zamaane vaalaa

vo jalva-e-sad-rang mein ik Dhang se niklaa
jo misra tire sina-o-aahang se niklaa

hain kushtagaan-e-sadaa aakhiri kinaare par
ai khaamushi tiri tarsil hone vaali hai