mujh ko gham kaa na kabhi dard kaa ehsaas rahaa — Asghar Velori

un ke haathon se milaa thaa pi liyaa
zahr thaa par zaaiqa achchhaa lagaa

tire mahal mein hazaaron charaagh jalte hain
ye meraa ghar hai yahaan dil ke daagh jalte hain

shikaar apni anaa kaa hai aaj kaa insaan
jise bhi dekhiye tanhaa dikhaai detaa hai

log achchhon ko bhi kis dil se buraa kahte hain
ham ko kahne mein buron ko bhi buraa lagtaa hai

duniyaa se khatm ho gayaa insaan kaa vajud
rahnaa paDaa hai ham ko darindon ke darmiyaan

raushni jab se mujhe chhoD gai
shama roti hai sirhaane mere

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

jise paDhaa nahin tum ne kabhi mohabbat se
kitaab-e-zist kaa vo baab hain mire aansu

khud mire aansu chamak rakhte hain gauhar ki tarah
meri chashm-e-aarzu mein maah-o-akhtar kuchh nahin

tu ru-ba-ru ho to ai ru-e-yaar tujh se kahein
vo harf-e-gham ki harif-e-gham-e-zamaanaa hai