dil ki maujon ki taDap meri sadaa mein aae — Asif Saqib

sameT le gae sab rahmatein kahaan mehmaan
makaan kaaTtaa phirtaa hai mezbaanon ko

raste ki anjaan khushi hai
manzil kaa an-jaanaa Dar hai

lakir khinch ke mujh pe vo phir mujhe dekhe
nigaar-o-naqsh mein chehra hai hu-ba-hu meraa

siine ke biich 'saaqib' aisaa hai marnaa jiinaa
ik yaad ji uThi thi ik yaad mar gai hai

kis darja munaafiq hain sab ahl-e-havas 'saaqib'
andar se to patthar hain aur lagte hain paani se

qaidi rihaa hue the pahan kar nae libaas
ham to qafas se oDh ke zanjir chal paDe

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

kyaa gham agar yazid rahaa eqtidaar mein
parcham to phir husain kaa mir-e-avaam hai

mumkin hai ashk ban ke rahun chashm-e-yaar mein
mumkin hai bhuul jaae gham-e-rozgaar mein

udaasi raastaa batlaa rahi hai haath pakDe yuun
pata maa'lum ho jaise hamaari maut kaa is ko