mumkin hai ashk ban ke rahun chashm-e-yaar mein — Yaseen Zameer

har aankh ik savaal tahi-dast ke liye
kab tak marungaa mere khudaa baar baar main

kuchh vaqt apne saath guzaarungaa main 'zamir'
khud se agar milaa jo kabhi ku-e-yaar mein

kis se karun main apni tabaahi kaa ab gila
khud hi kamaan-ba-dast huun khud hi shikaar main

muddat hui hai dast-o-garebaan hue hamein
ummid naa-umidi khudaa rozgaar mein

zanjir zulf-e-siyaah samundar nigaah-e-shokh
jaaun kahaan faraar kaa rasta koi to ho

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

so jaati hai basti to makaan pichhli gali mein
tanhaa khaDaa rahtaa hai makinon se nikal kar

dard zanjir ki surat hai dilon mein maujud
is se pahle to kabhi is ke ye pairaae na the

gham ke bharose kyaa kuchh chhoDaa kyaa ab tum se bayaan karein
gham bhi raas aayaa dil ko aur hi kuchh saamaan karein