tumhaare saath mire mukhtalif maraasim hain — Asim Wasti

sikhaa na duaaon mein qanaaat kaa saliqa
vo maang rahaa huun jo muqaddar mein nahin hai

log kahte hain ki vo shakhs hai khushbu jaisaa
saath shaayad use le aae havaa dekhte hain

nahin vo sham-e-mohabbat rahi to phir 'aasim'
ye kis duaa se mire ghar mein raushni si hai

tu mire paas jab nahin hotaa
tujh se kartaa huun kis qadar baatein

miri zabaan ke mausam badalte rahte hain
main aadmi huun miraa e'tibaar mat karnaa

kahin kahin to zamin aasmaan se unchi hai
ye raaz mujh pe khulaa siDhiyaan utarte hue

ho koi mauj-e-tufaan yaa havaa-e-tund kaa jhonkaa
jo pahunchaa de lab-e-saahil usi ko naakhudaa samjho

haan ye bhi tariqa achchhaa hai tum khvaab mein milte ho mujh se
aate bhi nahin gham-khaane tak vaada bhi vafaa ho jaataa hai

rah-e-vafaa mein luTaa kar mataa-e-qalb-o-jigar
kiyaa hai teri mohabbat kaa haq adaa main ne

vafaa karo jafaa mile bhalaa karo buraa mile
hai riit desh desh ki chalan chalan ki baat hai

ye aur baat ki iqraar kar sakein na kabhi
miri vafaa kaa magar un ko e'tibaar to hai

har mauj-e-tund jaanti hai naa-khudaaiyaan
tufaan to mere saath hai gar naakhudaa nahin