ho koi mauj-e-tufaan yaa havaa-e-tund kaa jhonkaa — Akhtar Ansari Akbarabadi

kuchh andhere hain abhi raah mein haail 'akhtar'
apni manzil pe nazar aaegaa insaan ik roz

abhi bahaar ne sikhi kahaan hai dil-jui
hazaar daagh abhi qalb-e-laala-zaar mein hain

zulm sahte rahe shukr karte rahe aai lab tak na ye daastaan aaj tak
mujh ko hairat rahi anjuman mein tiri kyuun hain khaamosh ahl-e-zabaan aaj tak

dushmani ko buraa na kah ai dost
dekh kyaa dosti hai ghaur se dekh

ajiib bhul-bhulayyaan hai shaahraah-e-hayat
bhaTakne vaale yahaan justuju ki baat na kar

bachaa bachaa ke guzarnaa hai daaman-e-hasti
sharik-e-khaar bhi kuchh jashn-e-nau-bahaar mein hain

tufaan ke baa'd main bhi bahut TuuT saa gayaa
dariyaa phir apne rukh pe bahaa le gayaa mujhe

darakht karte nahin is liye umid-e-vafaa
vo jaante hain parindon ke par nikalte hain

kyuun logon se mehr-o-vafaa ki aas lagaae baiThe ho
jhuuT ke is makruh nagar mein logon kaa kirdaar kahaan

baandh ke ahd-e-vafaa log chale jaate hain
chhoD jaate hain faqat jism ki uljhi gaanThein

ab ke ummid-e-vafaa baandh rahaa huun jis se
log kahte hain ki vo shakhs bhi harjaai hai

mohabbat ruup mein Dhalti to vo ik devtaa hotaa
main us ko pujne lagtaa agar vo baa-vafaa hotaa