khvaab kaa intizaar khatm huaa — Asima Tahir

nahin vo itnaa bhi paagal nahin thaa
jo mar jaataa miri vaabastagi mein

mire vajud ke andar hai ik qadim makaan
jahaan se main ye udaasi udhaar leti huun

ham ne jab haal-e-dil un se apnaa kahaa
vo bhi qissa kisi kaa sunaane lage

shahzaadi ke kaanon mein jo baat kahi thi ik tu ne
baad tire vo baat tire hi afsaanon mein gunjti hai

Dubne ki na tairne ki khabar
ishq-dariyaa mein bas utar dekhun

khushbu jaisi raat ne meraa
apne jaisaa haal kiyaa thaa

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

pyaaso raho na dasht mein baarish ke muntazir
maaro zamin pe paanv ki paani nikal paDe

kuchh aisaa kar ki khuld aabaad tak ai 'shaad' jaa pahunchein
abhi tak raah mein vo kar rahe hain intizaar apnaa

ai saalik intizaar-e-haj mein kyaa tu hakka-bakkaa hai
bagule saa to kar le tauf dil pahlu mein makka hai

qayaamat se nahin kam intizaar-e-vasl ki lazzat
khudaa jaane kahin vaada vafaa hotaa to kyaa hotaa

kisi ke vaaste tasvir-e-intizaar the ham
vo aa gayaa pa kahaan khatm intizaar huaa