ik navaa-e-rafta ki baazgasht thi 'qaisi' — Aziz Qaisi

kai baar daur-e-kasaad mein gire mehr-o-maah ke daam bhi
magar ek qimat-e-jins-e-dil jo khari rahi to khari rahi

nazar uThaao to jhuum jaaein nazar jhukaao to Dagmagaaein
tumhaari nazron se sikhte hain tariq maut-o-hayaat ke ham

tujhe siine se lagaa luun tujhe dil mein rakh luun
dard ki chhaanv mein zakhmon ki amaan mein aa jaa

aap ko dekh kar dekhtaa rah gayaa
kyaa kahun aur kahne ko kyaa rah gayaa

chal 'qaisi' mele mein chal kyaa ronaa tanhaai kaa
koi nahin jab teraa meraa sab mere sab tere

ab to faqat badan ki muravvat hai darmiyaan
thaa rabt-e-jaan-o-dil to shuruaat hi mein thaa

jab ki pahlu se yaar uThtaa hai
dard be-ikhtiyaar uThtaa hai

ye aansu ponchh lijiye aur muskuraaiye
chaara nahin hai koi bhi rukhsat kiye baghair

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

ham haal to kah sakte hain apnaa pa kahein kyaa
jab vo idhar aate hain to tanhaa nahin aate

main ne apni palkon par gham-kade sajaae hain
aarzu ke maatam mein sogvaar hasti hai