gham-e-uqbaa gham-e-dauraan gham-e-hasti ki qasam — Aziz Warsi

tumhaari zaat se mansub hai divaangi meri
tumhin se ab miri divaangi dekhi nahin jaati

kaise mumkin hai ki ham donon bichhaD jaaeinge
itni gahraai se har baat ko sochaa na karo

jahaan mein ham jise bhi pyaar ke qaabil samajhte hain
haqiqat mein usi ko ziist kaa haasil samajhte hain

tum pe ilzaam na aa jaae safar mein koi
raasta kitnaa hi dushvaar ho Thahraa na karo

dil mein ab kuchh bhi nahin un ki mohabbat ke sivaa
sab fasaane hain haqiqat mein haqiqat ke sivaa

ik vaqt thaa ki dil ko sukun ki talaash thi
aur ab ye aarzu hai ki dard-e-nihaan rahe

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ye saal tul-e-masaafat se chuur chuur gayaa
ye ek saal to guzraa hai ik sadi ki tarah

kisi ki yaad manaane mein iid guzregi
so shahr-e-dil mein bahut duur tak udaasi hai

naaz kar naaz tire naaz pe hai naaz mujhe
meri tanhaai hai partav tiri yaktaai kaa